Vawiin khan Aizawl Hmathlir Pawl (AHP) chuan Chief Minister Zoramthanga hnenah an pawl duh dan hrang hrangte an thlen.
Aizawl Hmathlir Pawl chuan a hnuai a mi ang hian an ngaihpawimawh zual an tarlang.
1. Mipui punkhawmna Hall leh Concreat buiding sak loh nise: Kan hriat theuh angin Lammual leh Vanapa Hall ah te puipunna a awm in traffic jam in Aizawl khawpui hi che theilo in a siam ani ta ber a. Hei hian khawpui chhung mipuite mai bak ah thingtlang lam atanga Aizawl a pisa dawr leh bazar te tan harsatna namen lo thlenin, hun kan paih nasa em em a. Hei hi mithiam zawkten an chhut dan phei chuan kan hun hlutak kan khawhral piah lam ah sum tamtak kan hloh thin a ni.
2. Thingkung chi hrang hrang phun a Green Park siam ni rawh se: Khawvel khawpui dangte mai bak ah India ram chhung ngei ah pawh khawpui chhungah hmunawl zau tak tak Green Park a tan a siam ani a. Heng Park te hi apui a pangin tual len nan leh hahdam nan an hmang thin a, tin, khawpui chhung boruak vawng thianghlima ti daitu a ni bawk thin. Aizawl khawpui pawh hian hei hi a mamawh in mipuite pawn an awh leh thlakhlelh a ni. Chuachhap ah tunlai khawvel lum zel leh Polution nasa zel lak a kan in venna leh hmalakna pawimawh tak ani bawk dawn ani. Kan Aizawl khawpui Concrete Jungle lo ni ta hian helai hmunawl kan neih chhun hi thawk lakna Chuap atan leh boruak min tih thianghlim sak a min vawndaih saktu a tan kan Mizoram a awm thing chi hrang hrang, par leh rah chi te phun a, mihring leh nungchaten nuam ti tak a kan hmantlan theih tur a siam hi kan duh tak zet a ni.
3. Chhiatrup na liantham lo thien palh a hmun tangkai ni tur a dah: Mithiamte min hrilh angina Mizoram hi lirnghing na tak thlen theihna hmun Zone V (Five) an tih, Indian sub-continent tectonic plate in Eurasian khawmualpui hmar-chhak zawnga a nek na lai chunga awm kan ni a. Hei vang hian chhiatna rapthlak tak Aizawl khawpui hian a tawk thei reng ani. Hetiang chhiatna te hi lo thleng ta se Aizawl khawpui chhung hi a tlusawp nasa in mipuiten kan tawrh nasat dan tur hi hriat phak pawh anilo ang. Chung hun ah te chuan in leh lo neilo leh hliamtuar te han senghawina hmun tur hmunawl leh him kan neih a pawimawh dan tur hretur in mithiam nih kher a tul awmlo e. Damdawi leh tui in tur tak ngial in pekna tur hmunawl leh him tur pawh kan lo in rinlawk a tulin a pawimawh tak zet a ni. Hengte a vang pawh hian Assam Rifles chhuahsan tur Lammual leh a chheh vel hi hmun him leh remchang a tan dah awl hi a tul tak meuh in kan hria.
4. Aizawl khawpui Traffic Flow leh Parking tih zia awm nan : Aizawl khawpui chhung traffic mangan thlak khawpa alo tawt tak vang hian tunai a tih zia awm deuh anih theih nan leh lirthei dahna hmun tur engemaw tal buatsaih erawh tha kan ti a. Chumi a tan a rawtna hetiang hian kan han siam bawk e. Assam Rifles ho damdawiin tlang Bazar Bungkawn saw rawt mam nise. A him chin khawchhak lam nek thei ang ber atangin Multi-level Parking, a him chin tur a sang, siam nise, tunlai thiamna nen building zangkhai thei ang ber tura duan ni bawk se. Chhimlam atanga lirthei Armed veng lam chhuk tur te, tuna kawngpui dinglam Ritz Hotel zawn vela tang hian leihlawn siam a kal tir nise, tin, he leilawn atang tho hian Parkinga luhna siamsak ni bawk se.
Hmarlam atanga lokal lirtheite leilawn hnuai ah tlantir in a duh tan Parkinga luhna siam ni bawk se. Armed Veng lam atanga lokal lirtheite leihlawn veilam ah lo tlan chho in chhimlam pan kawngpui ah inpawhse (merging traffic). Multi-level Parking atanga hmarlam pan a kal tur te tlan nan Parking Chhawnghnihna (Second floor) atangin leihlawn siamin HMT Pu C Thangkima dawr kawt zawn vel ah hmarlam pan traffic zawm turin chhunluh nise.
Heti chung hian Multi-level Parking kawt ah hian mipui thut leh chettlatna tur hmunawl zautak a la awm thei dawn a, hengte hi thingkung leh thutna te siamin cheibawl nise. Tin, he Multi-level Parking atang hian Lammual va pawh turin ke a kalna chungkhuh nei, Wheel Chair nawr theihna tur ngaihtuah chunga zautham deuh a siam nise.
Tuna Canteen kual hi hmunawl leh thut thawven theihna hmun ah bawk siam nise. Hmarlam a kual let tur lirtheite tlan nan Baze tlang sir ah hian kawng siam chho in leihlawn in tuna kawngpui kualna chungah hian kawng chhawng siam nise, kawngkual tawp an in finna ah hian chhunluh leh nise. Temple lam atanga lokal lirtheite hian kawngchung atanga lokal hmarlam pan lirtheite an pawh nan tuna AR te Unit War Memorial zawn ah hian kawngpui hi la mar ila.
Heng kan rawtna te hi Architect leh Engineer te nen en ho a duan nise Aizawl khawpui hian a mawi phah in a thawven phah em em dawn a ni. A.R Quarter Guard hi Mizoram Chapter INTACH ten Heritage Site a an lo puan tawh angina vawn that nise, a bak zawng building te hi thiat in AR Damdawiin tlang Bazar Bungkawn kan rawt mam na leivungin siam rem nise.
Heng hmunawl te hi, Lammual thlanglam thleng hian ram ngawah siam ila, nungcha leh mipuite nuam leh thlamuang tak a hahdamna hmun, Aizawl khawpui min vawngdai a min tih thianghlim saktu leh min rawn tlawhtu pawnlam mi te pawn an thlak hlelh tham tur hmun ah helai hmunawl hi I siam ang u tih hi kan rawtna a ni e.
Khing kan rawtna te khi chiang zawk a sawiho tur leh a tul ang a bawhzui turin keini Aizawl Hmathlir Pawl te hi englai pawn kan in hawng reng a ni.
