Vawiin July ni 14, 2023 (Zirtawpni) hian MPCC chuan mi thar lawmluh inkhawm, Lal Thanhawla Auditorium, Congress Bhawan, Aizawlah hman a ni a. He hunah hian MPCC President Pu Lalsawta chuan mi thar Pu VL Remruatpuia Political Affairs Committee member, Research Wing member, Market Study Team Member, ZPM General Hqrs; Pu Lalsanglura Ralte, Political Affairs Committee member, Ṭawngṭai Pawl Secretary, ZPM General Hqrs; Pu Lalhmingthanga Sailo, Executive Member ZPM General Hqrs, Pu Samuel Lalhriatrenga, Pi Ramnghaki te bakah Aizawl leh a chhehvel khua atangin mi 170 chuang Congress party-ah a lawm lut.
He huna thusawitu MPCC President Pu Lalsawta chuan, kan ram dinhmun kan hria a. HIV/Drugs/Eirukna leh thluaka sum lut natna a hluar hle a. Ral atangin heng hi a thlirtu kan ni thei lo. Politics hmanga do let a ngai a. Edmund Burke chuan sual hneha awm dan awlsam ber chu, “mi tha te an ngawih reng hi a ni,” a ti tih sawiin, Politics tha lo titute chu mi tha lo te hnuaiah an kun tho ang. Heng mi tha lo te hnuaia kan kun lohna turin mi tha te lo chhuak ula, keini leh chhuan lo la awm zel tur te tan ram tha zawk i din ang u, a ti.
Pu Lalsawta chuan, Congress Party zawm therte chuan an kal tumna, an chuanna lam pan tura driver-in motor a khalh loh vanga chhukin an tum ram pan turin he hmunah hian Sorkar tha siam turin an lo kal a, an tum ram an pan tur hi Congress party chuan kan hlenchhuah sak dawn a ni, tih sawiin, Congress party hi ram siam thatna inpui a ni a. Mahni ina lut in nih avangin in inthlahrung thiang lo. Ram rorelna tha siam turin nangni hi kan sawt pui dawn che u a, kan chakna in ni tih kan hria, ram tha zawk in beisei hi kan thlen pui ang che u, a ti.
Sakhaw zalenna dodalna thlipuiin India ram a run mek a, Manipur-ah kan unau ten nasa takin an tuar mek. Sakhaw zalenna dotute’n kan ramah bu an khuar tawh. ZORO buatsaihin Manipur-a Zohnahthlakte tawrhpuina leh sunna hun buatsaihin hun kan hmang a. Hei hi Kristian leh Hindu sakhua indona a ni. UCC leh sakhaw Zalenna duh lotute do tur hian keini Kristiante hi kan tanrual a ngai. Hun kal tawhah Mizoram mipuite’n nasa takin CAB kan do a. Mahse MNF chuan an ‘Amen’ a, an kutah an intulut a, kan hnam leh kan sakhua dinhmun him lovah an dah a. Kan hnam leh sakhua, kan dinhmun ti tleu tu hi Congress Party chuan kan do zel dawn. Kumin 2023 inthlan hian kan hnam leh kan sakhua a him leh him loh a hril dawn. Kohhran leh NGO te, Political party te pawh kan hnam lungphum tihnghina awm mek min do pui turin ka sawm che u a ni, a ti.
Mi thar lawmluh atangin Pu VL Remruatpuia, Pu Lalsanglura Ralte leh Pu Lalhmingthanga Sailo te pawhin thusawiin, Mizorama hnam hrang hrang leh Kristian sakhua humhim turin Central leh Mizoramah Congress party a sorkar a ngai a. Tunah hian sorkar mai turin boruak tha tak neiin a lian chho chak hle a. Eiruk leh hlemhletna umbo turin Pu Lalsawta chu Mizoram tan a rintlak ber. Sorkar tha Mizoram tana siam turin a lu ber mi dik leh mi rinawm zui a ngai, tih an sawi bawk.
He hun hi Pu Lal Thanzara MPCC Vice President in a kaihhruai a, Maj K. Lalrinawma Secretary, MPCC in hunserh a hmang a. Pu Sangzela Tlau-in lawmluh te chanchin leh hmelhriattirna hun a hmang bawk. Pu H. Rohluna Gen.Secy. leh Vice Chairman, Campaign Committee in lawmthu sawina hun hmangin; Pi Lalhmangaihzuali (Zualbawihi) leh Lalrintluangi (Rinrini) te’n kalkhawm mipuite zaiin an awi bawk a ni.
