Vawiin July 14, 2023 (Zirtawpni) hian Champhai South Block Political Training chu Zotlang YMA Hall, Champhai-ah neih a ni a, training petu Isak Malsawma, PAC chuan, “ZPM hian sawrkar ve hrim hrim kan tum lova, sawrkar tha Pathian duhzawnga ram rorelna tundin hi kan thupui ber a ni,” a ti a, Champhai South bial viltu Lt.Col. Lalhmingthanga chuan Champhai South Block huamchhung atangin mi , MNF atangin mi 123, Congress atangin mi 185 leh Neutral atangin mi 25 a vaiin mi 333 a lawmlut bawk a ni.
Isak Malsawma, PAC chuan, “Mizoram chhanchhuah ngai tawh tak hi, mahni indah tha a, mahni inhal ral ngama politics hi kan khelh a ngai a, Pathian duhtui tak nei kan nih avang hian kan chetdan leh awm danah kan fimkhur a ngai a ni. ZPM hian sawrkar ve hrim hrim hi kan tum a ni lova, sawrkar tha Pathian duhzawnga ram rorelna tundin hi kan thupui ber a ni,” a ti.
Lt. Colonel Lalhmingthanga, Champhai South bial viltu pawhin thusawiin, “Champhai South hi ka lo chen thanna a ni lova, chhungkhat laina mumal tak pawh ka neih lohna hmun a ni a, chuti chunga ka rilru tihlimtu erawh chu Block leh Unit hruaitu ZPM lo support-tu zawng zawng hi ka chhungte in ni. Pathian leh mipui zara thlan tlin ka lo ni ve a nih chuan ka eiru lovang tih hi ka tiam duh che u a ni. MLA Fund mai bakah sum hailuhna tur Central Project tam tak a awm a, he bial tan hian a tam thei ang ber hailuta dik taka hman kan tum dawn a ni. Thalaite hmasawnna tur atan infiamna mai piah lamah India ram lairil thleng thalai tam zawkin eizawnna rintlak kan neih theihna turin hmalak kan tum dawn a, ka theihna zawng zawng he bial tan leh he ram tana hmang turin Pathian rinchhan chungin ke ka pen dawn a ni,” a ti bawk.
Pu C.Lalthanfela, General Secretary, ZPM General Headquarters pawhin thusawiin, “Pathian zawnchhuah ram inti te hi vawiinah hian sal-ah kan tang mek a, kan saltanna laka hruaichhuah kan nih theihna turin Pathianin ZPM party min pe a, Kanan ram thleng zo ve lo pawl kan ni palh ang tih hi i hlau ang u. Mizoram politics-ah Pathian ram lo thleng rawh se tih hi kan au hla ni zel rawh se. Hruaitu kan nei a, mi fel famkim anni bik hauh lo, chutihrual chuan an rorelna leh min dahna hmun apiang pawm thiam turin kei pawh hi ka inhal ral ve a, ka rilru natna leh MLA candidate tura min beiseitu zawng zawng pawh kan hotute ruahmanna siam pawm thiam turin ka fuih ve zawk thin a ni,” a ti bawk.
Dr. C. Lalrammawia, ZPM General Headquarters Thalai President leh East Tuipui Bial viltu ni bawk chuan thusawiin, ” Kan ram hi a hmanhmawh tawh a, he ram hian sawrkar tha, ram hmasawnna duha hna tak tak thawk sawrkar hmuh an duh tawh a. Tun hmaa sawrkarna vuantuten term hnih tal sawrkarna an lo chelh tir thin hun chu vuiliam a ni mek a, hna thawk tha, an sawi anga awm, mipui sawrkar tak tak hmuh chakin ram mipui an tuihal mek a. ZPM thli a thleh kan tih nachhan hi eng dang ni lovin, party sawrkar ni lo, mipui sawrkar hmel hmuh thuai thuai hi ram mipuiten an nghakhlel hle a ni. Inrahbehna politics hi kan phelh a ngai a, kan puan in kan tihzauh a tul a, mi zawng zawng lenna party ni turin ZPM hi i inbuatsaih ang u. Party dang hian ZPM hi sawrkar mai thei tura min rin avangin nasa takin min chirhtheh a, dawt leh hmanraw hrang hrang an hmang mek reng a, heng thil avang hian ZPM hi kan zam dawn lo va, Pathian rinchhanin hmalam panin ke i pen zel ang u,” a ti bawk.
