Mizo Hnam Inkhawmpui (MHI), “Manipur state chhunga cheng kan unau Mizo te chunga Meitei ho chetdan rãwng tak hi Mizo Hnam Inkhawmpui (MHI) chuan demawm a ti takzet a, ram hruaitu lû berin a ngaihthah lui tlat pawh hi hriatthiam harsa a ti hle a ni. Heng a hnuaia thil thleng kan rawn tarlan bakah hian thil dang rapthlak tak tak pawh Meitei ho hian kan unaute chungah an thlentir tih chiang takin a hriat theih a ni. Kum zabi 21-na kan chuan kai tawh hnu, khawvel changkang tawh taka kan khawsak tawh laia hnam rilru hniam lutuk leh mahni mihring pui zahna nei reng reng lo, ramsa rilru ang lek pû hnam an lo la awm tlat mai hi Mizo Hnam Inkhawmpui chuan lungchhiatthlak a ti hle bawk a ni,” tiin a hnuai a mi ang hian thuchhuah an siam.
1. May ni 4, 2023 a thil thleng, kan unau Kuki (Vaiphei) hmeichhe pahnih chu Meitei mipa rualin saruak a an khalh hnuah an pawngsual rawn a. Chubak ah, anmahni chhan tumtu chhungkaw pa ber leh a fapa chu an that bawk a ni. Hmeichhe pahnih te saruak a an hruai lai hi a video pawh a tlângthang nasa a, khawvel a dêng chhuak hial a ni!
2. Dt. 2nd June, 2023 khan tlangval David Ṭhiek chu nasa taka sawisak a nih hnuah a lu tan sakin palah tàr a ni a. A taksa ṭhenkhat te pawh an chansawm a an halral zui bawk. Kan unau te tawrhna-ah hian kan na ve a, an tân tih theih kan neih chuan Mizo Hnam Inkhawmpui chuan theihtawp a chhuah zel dawn a ni.
3. Hetianga kan unau te tihboral vek tuma Meitei ho an chêt mêk lai hian, Parliament session awm mek ah “The Forest Conservation Act, 1980” thlâkna tur, “Forest (conservation) Amendment Bill, 2023” chu, Environment Minister Bhupender Yadav chuan putluh a tum mêk bawk a. He Bill hian a tum chu, “International boundary aṭanga Kilometres za (100) huam chhungah State Special provision-te râwn lovin Central Government-in a duh atan a hmang thei ang”, tih a ni ber a. A tum ber hi Sipai hmun emaw infrastructure dang te din ni a sawi a ni.
Thil dang tam tak a kengtel thei tih erawh a hriatthiam theih nghal vek a ni. International boundary aṭangin Mizoram hi Kilometres za (100) huam han ngaihtuah chhin ila, him lai a awm mang lo tih kan hrethiam thei mai awm e! Mak tak mai in he Bill proposal an neih ni kha Manipur buaina chhuah ni, May ni 3, 2023 nia sawi a ni! Manipur buaina chungchang ah khawvel dêng chhuak khawpa India a mualpho hma chuan Prime Minister in ṭawngkam khat mah a chhak chhuak duh lo a, buaina chhuah ni tak in bill hi put luh a ni bawk a. Chuvangin, zofate chunga rãwng taka chêtna leh he, “The Forest conservation Bill”, thar hian inzawmna a nei ni in Mizo Hnam Inkhawmpui chuan a hria a. Chuvangin, Mizo Hnam Inkhawmpui chuan he Bill pawh hi a dodal tlat a ni.
4. Tin, Uniform Civil Code (UCC) BJP Sorkar in a sawi rik reng hi keini, Christian te tan a him loh avangin kan dodal reng dawn bawk a ni.
Thil thleng hrang hrang te aṭanga chiang taka lang ta chu, BJP sorkar hian Zofa te chenna ram hi min chhuh sak a tum a, Kristian sakhaw bia kan nihna denchhen in min nuai chimih dan zawngin hma a la mêk, tih hi a ni.
Ram leh hnam zalên, tu thuhnuaiah mah awm ngai lo hnam te hi India awpna hnuaia awm tura bum luh kan ni a, min bum lûttu te hian kan hnam leh kan sakhua nuai chimih a kan ram min chhuh sak tumin hma an la ta a. Chuvangin, zofa te tân India hnuaia awm reng hi a him ta lo niin Mizo Hnam Inkhawmpui chuan a hria a, kan zalênna min pe let leh turin India sorkar hi a ngên a ni.
