October 2, 2023-ah LPS Arena, Falkland Veng, Aizawlah LPS Pro Fight ṭan a ni dawn a, nikuma weight hrang hranga champion-te seed pek vek an ni ang.
Pro Fight kalphungah champion laiin title a humhim theihna tur hun ṭha siamsak a ni ṭhin a. Amah cho thei tur zawnnaa tlang nen a tawp Title Fight-ah an intawng ṭhin a ni.
Nikum khan weight pangaah title an inchuh a, fly-ah Laldinsanga (Lunglei), bantam-ah Lalrinngheta (Tuipui), feather-ah Lalrosangzuala (Chaltlang), light-ah Vanlalawmpuia (Khuangthing) leh welter-ah C Lalhruaitluanga (Chawngtlai) an champion.
Tun ṭumah weight panga tho awm dawn mah se tihdanglam a ni a; nikuma awm featherweight nuai bovin nikuma tel lo middleweight telh a ni ve thung.
Hei vang hian khairual taka champion laite kalpui a nih theih nan a tawp Title Fight-ah chauh ni lovin khawi round aṭangin emaw an khelh vek a ngai dawn a. An telna weignt-ah seed pek vek an ni ang a, boxer tel an tam dan azirin an khelh hun tur siam fel tur a ni.
August 15, 2023 aṭangin LPS Office, Zarkawtah pakhat Rs 10 zelin boxer entry form lak chhuah theih a ni dawn a, September 20 thleng theh luh theih a ni ang.
November tir lamah zan hnih awh Title Fight buatsaih turin ruahmanna an siam fel a. Title Fight-a tel ve lo tur professional inhnek dang zeh tel a ni dawn a, chutah chuan Pro Fight champion lo ni tawh pahnih NT Lalbiakkima leh HC Johnkenty Vanhlimpuia bakah F Zoramchhana tan hun siamsak an tum.
Nikum khan champion lawmman atan medal lian awrhtir an ni a, kuminah champion kawnghren hlan vek a ni ang. Kum kal taah semifinal aṭangin professional inhnek chhinchhiahna boxrec-ah ziah luh vek a ni a, tun ṭumah Title Fight chauh ziah luh a ni ve thung dawn a, a hma lam inhnek zawng zawng Pro Fight kalphung pangngai anga kalpui a ni ang.
Hetih lai hian mipui 1000 chuang len theihna tura sak mek LPS Arena zawh a la ni lo va; Pro Fight ṭan hun October 2-ah a nih dan tur taka hawn hman a ni dawn lo tih a chiang bawk. Mahse, inhnek thlen theihna turin buatsaih a ni dawn tho a ni.
