Mizoram State AIDS Control Society (MSACS) leh Association for Voluntary Blood Donation (AVBD) chuan vawiin August 1, 2023 khan Kolasib-a IPR Conference Hall-ah ‘Training of Blood Donor Motivators’ an buatsaih.
Thisen pek chungchang zirhonaah hian Kolasib district-a kohhran pawl hrang hrang thalai pawl leh tlawmngai pawl hruaitute an tel a; AVBD Gen.Hqrs secretary (publicity) K Zothanpara’n kaihruaiin, Kolasib AVBD secretary Laltanzuala’n thisen peka an dinhmun tlangpui a sawi.
AVBD Gen.Hqrs president C Lalnunnema, Kolasib Blood Centre medical officer Dr Janet Zoremnghaki, MSACS assistant director pahnih F Lalmuanpuii leh Lalhmingliani Pachuau ten a thlawna thisen pek chungchang leh a kaihhnawih thil pawimawh hrang hrang an zirtir a; zawhna leh chhanna leh sawihona hun hman a ni bawk.
Zirhonaah hian Mizoram chu India ramah a thlawna thisen pekah state ti tha parukna a nih thu tarlan a ni. Sorkar kum liam ta 2022-23 chhung khan Mizoramah thisen unit 37,419 pek niin, chung zinga unit 34,252 chu pek bik nei loa a thlawna pek a ni a, voluntary donation hi 91.54% a ni tih tarlan a ni bawk.
