Vawiin hian PC Party dintu Brig.T.Sailo, nimin March ni 27 a a thih champha vawi 7-na, PC Party Office Treasury Square ah urhsun taka hman a ni a. Thusawitu Brig.Thenphunga Sailo fapa Dr.Lalrinliana Sailo chuan, “Amah lo thawhpui thinte leh ṭhalai rual, dikna ngaisânga hlemhlêtna do leh hua zawng zawngte kan ram, kan hnam, kan sakhua humhim tûrin neitu thinlung pûin thawk ho zêl tûrin ka sâwm a ni,” a ti.
He hunah hian Pu Vanlalruata Sr.Vice President pawhin, Pu Ṭhena khân politics a zawm tirh khân Mizoramin enge kan mamawh? tiin a zir nghal a. Chumi a zirna aṭang chuan Mizoram mamawh milpuiin,tun thlenga la sawi leh hmâ pawh lak zêl la ngai 6 basic needs kha duangin a bawhzui ta a ni ti. Chûng bâka a hma lâk ṭhenkhatte- dan loa Mizote chunga India sipaite rawng taka an chetna tudai tura Brig.T Sailoa hoa Human rights chak taka an kalpui avanga sipaite laka Mizote humhima kan awm tâk thû te, Vairengtea Oil depot a lo din tawh te, Manipur leh Tripura lama chakkhai lakna tura inkalpawhna kawngpui a lo ruahman tawhna te a sawi a.
Heng bakah hian Pu Vanlalruata chuan Pu Thena’n
ram hmasâwn nãna thil pawimawh hmâ a lo lâk -Kawlphetha chaknaa intodelhna Bairabi hydel project leh Serlui A leh B hmalakna, National Highway 54 bul tanna te, Aizawl khawpui Greater Water Supply Scheme a lo buatsaih tawhte , Aizawl Capital Extension Project a lo ruahmanna te sawi langin leh Lengpui Airport a lo ruahmanna te, Bairabi rail head leh buh leh bala zofate intodelhna tura phaizâwl leilettûr hectare 70000 ( singsarih ) a zau ram an lo en thlithlai tawh te a sawi bawk.
