India Independence Day vawi 77-na chu vawiin khan India ram hmun dangte rualin Aizawl Lammual-ah ropui taka lawm a ni a. Khuallian Pu Zoramthanga, Chief Minister chuan zing dar 8:00 a.m ah India Hnam Puanzar pawt pharhin Parade Contingent 27 te chibai a chhang let.
Mizoram mipuite leh khawvel hmun tinrenga India khua leh tuite duhsakna hlanin; kum 200 chuang zet awpbeha awm tawh India ramin zalenna a hmuh theih nana beitu hruaitu hmasate leh tha thawhtute zahna chibai a buk a ni.
Zalenna boruak nuam tak hnuaiah India ram hmun dangte ang bawkin Mizoramin hmasawnna duhawm tak tak a hmu nasa tih sawiin; kumin phei chu India ramin G-20 Presidency a chelh kum a ni a, he mawhphurhna zahawm tak hi tha taka a hlen theih nan ram chhung hmun hrang hrangah inkhawmpui buatsaihin Mizoram pawhin G-20 Business – 20 Conference ropui tak March ni 2, 2023 kan kan thleng a, ram 17 atangin palai an rawn kalkhawm a ni, a ti. Kum li leh a chanve kalta chhung khan harsatna chi hrang hrangin min chim a, amaherawh chu ram mipuite tanpuina leh thawhhona tha tak avangin khang harsatna tam takah khan hnehtu kan ni thei a ni. Covid hripui vang khan kawng tinrengah harsatna tawk mah ila ram mipuite hamthatna tur hmasawnna hmel duhawm tak tak nei turin sawrkar chuan theihtawp chhuah a thulh ngai lo, a ti bawk.
Vanduaithlak tak maiin March thlatir atanga kan thenawm state Manipura buaina chhuak chuan vawiin thlengin min la chim a. Buaina a chhuah rual khan Mizoram sawrkar chuan a khua leh tui, a bik takin Imphal-a awmte chhanchhuahna hna a thawk nghal a, Imphala kan mi leh sa tangkhang mi 264 te chu thlawhna hmanga thiar chhuah niin hemi atan hian sawrkar chuan Rs. 36 lakh chuang a seng a ni. July ni 18 thlenga chhinchhiah chinah Manipur atangin raltlan 12,509 an rawn lut tawh a, Relief Camp hi Aizawlah leh District khawpui thenkhatah din niin heta awm mipuite tan hian buhfai 2388.50 Qtls pek tawh a ni. Kan unaute tanpui tur hian kohhran, tlawmngaipawl, thianho leh mimal tam takten an tawhhlawk em em a, an chungah kan lawm hle a. Mizoram sawrkar pawhin raltlante chhawmdawl nan hian Rs. 5 crore a ruahman tawh a, a bak mamawh dangte phuhruk nan sawrkar laipuiah Rs. 10 crore a dil mek bawk, tiin tunhnaia Mizoram dinhmun tlangpui a sawi a, hmasawnna atana sawrkar hmalakna hrang hrangte a tarlang bawk.
