India Independence Day vawi 77-na Aizawl sipai lammual-a lawmna-ah Chief Minister Pu Zoramthanga’n, ‘Kum li leh a chanve chhûnga kan hnathawhte hi a lungawithlâk thawkhatin kan hria,’ a ti chu ZPM Ṭhalai chuan mak a tiin, lungchhiathlâk a ti a, “CM thusawi hian mipuite a ṭhawng hle a ni,” an ti.
ZPM Thalai chuan, “Chief Minister chu a kaihhruai sawrkârin an hnathawh lungawithlak a tih chhante sawi fiah turin kan phut a, a duhsak zawngte hnêna restricted tender pe-te, Kamrula leh ama tupa Zoramchhana hnena contract hna lian zawng zawng deuhthaw a pe-te, Airport sak chim leh hna chhe lutuk-te, Chakai farm-a broccoli leh dhania hlîr lo awmte, SEDP board phuahchawp avanga kum tin mipui sum cheng nuai za tam luangral ziahte hi em ni lungawithlak a tih chhan? tih hi kan zawhna a ni.
“Chief Minister-in 2018 inthlan hmaa min tiam zingah Traffic jam awm tawh lohna khawpuia Aizawl khawpui siamte, kawng chhawng siamte, chhung tin hnena SEDP cheng nuai 3 pêk-te, Mizo buh hlîr kan ei tawh tur thu-te min tiam a, sawrkârna an chelh hnuah pawh Lammual atanga Assam Rifles sawn chhuahte, mau chîn hlawhtin avânga IAS bang an awm tur thute nen lam min la tiam chhunzawm reng a ni.
“Chief Minister leh MNF sawrkârin mipuite laka an thutiamte hi a hlawhtlinna hmuh tur mumal pakhatmah a awm loh lai a, an term tawp dawn Independence Day an hman hnuhnungberah pawh an sawrkârin hna an thawh ṭhat thu Chief Minister berin a chhak chhuak hian Mizoram mipuite a ṭhawng hle a, term tawp dawn thlenga Chief Minister a ṭawngvai reng mai hi mipuite zah lohna lian takah ZPM Ṭhalai chuan a ngai a ni.
“MNF sawrkâr chu siam ṭhat leh ngaihna awm lovah ZPM Ṭhalai chuan a ngai a, hei bak hi an mahni-ah beisei leh tur dang a awm chuan loh avâng leh inhmuh chhuah nachang an hriat loh avângin Pu Zoramthanga kaihhruai MNF sawrkâr chu hunin a liam pui mai dawn niin ZPM Ṭhalai chuan a ngai a ni,” an ti bawk.
