Zomi Council Steering Committee, Lamka chuan, “Manipur sorkarin anmahni sorkar tha chakna leh sorkar ni lo pawl dang tha chakna hmanga tuna Manipur hriat meka Zofa (Zomi/Mizo-Kuki hnam hrang hrangte) awmte nuai bo tuma an hmalakna chuan ni 100 chuang tawh a. Manipur hi chuan theihtawp a chhuah meuh meuh a, dan rorelna pawh awm mumal thei loin sorkar kut leh ke zawng zawngte pawh hnam lian zawkin a te zawk nawrchepnaah an tangho a ni.
“Zo fate hian FIR 7000 chuang, Meiteiho suahsual rawngbawlna chungchangah hian an thehlut a, ngaihsak a ni lo. Meitei chief minister-in FIR 6000 chuang chinfel tawh ang a sawi hi rin loh bak chu tihdan tur a awm hlawl lo. Manipur High Court Bar Association pawhin ualau takin hnam thlawp bik an han nei a, hei hian Zofate leh Meitei kar zau zia a tilang chiang hle.
“Meitei sawrkar leh khawtlang hruaituten zalen taka an duh duh an sawi a, Zofate tawngkam chhia leg tlahawlh deuh deuha social media leh thusawina remchang an neih hrang hranga an sawi laiin Zofa scholar te leh pawl hruaitute tan chuan anmahni lam thu leh hla han auchhuahpuitute tawrhtir zat zat an tum hi a âwm ang lo hle. Tin, ruahmanna fel thlap a Zofate thah leh an nunphung tichhiatsak hi, sorkarin thil a pangngai tawh tia a sawi reng laiin khaihlak awm loin a thleng reng a ni.
“Hetiang a nih avangin August 29, 2023 hian Zofa zinga Kuki te bul tuma Mass Rally neih an tum a; Union Home Minister-in kan chungchang dik lo lutuka a sawi leh kan duh leh ngaihtuahna te sawichhuak lo tura sorkarin min khap beh a tum dodalna tur a ni. Kuki Students’ Organization General Headquarters (KSO GHQ) duh angin he rally hi Lamka-ah chuan Joint Students’ Body-in a kaihruai dawn nghe nghe a ni. He hmalakna hi Zomi Council Steering Committee (ZCSC) chuan a thlawp a ni.
“ZCSC ngaihdan chuan remna leh muanna tluantling awm theihna tur Zofate tana inrelbawlna hran (Separate Administration for the Zo people) chauh hi a ni a, chu pawh chu inlungrual leh huapzo taka tih a nih chauhin a hlawhtling ang,” tiin thuchhuah an siam.
