Vawiin 18th August 2023 (Friday) hian BJP Mizoram Pradesh chuan Friday Political Session BJP State Office, Mipui Run ah neiin, Pi Lalremsangi Fanai, State Spokesperson-in inkhawm a kaihruai a, Dr. Numal Momin, Dy Speaker, Assam Legislative Assembly chuan thu a sawi.
Dr. Numal Momin chuan, “BJP Mizoram ah Mizoram mipuiin an hmelhriat mek zel a, Congress leh a chekkawi Party ṭhenkhat te’n Dawt hmangin bei ṭhin mahse mipui te’n thudik an hriat tawh avangin BJP Kristian te tana hlauhawm tak anga an sawina pawhin awmzia a nei lo chho ta zel a ni,” a ti.
Dr. Numal Momin chuan sawi chhunzawmin, “Kristian chhungkua kan ni a, ka pa hi Rawngbawltu hnamhnuaihnung te hnena chanchin ṭha hril ṭhintu a ni. Chutiangin kei ngei pawh Kristian ka ni a, vawiin ah hian Assam State ah Kristian MLA pakhat chauh ka awm a, nimahsela Sorkarna a hmuna pawimawh ber dawttu Assam Assembly Deputy Speaker nihna chu BJP Sorkarna ah ka chelh mek a ni. Congress hunlaiin Kristian MLA kan neih awm sawi tur avang hle a, BJP Sorkar ah erawh Secular India a nih angin thlei bik awm lovin nihna chanvo sang tak pawh keini Kristian te pawhin kan chang ve thei ta a ni. Congress Party chu inthlan dawn apianga mipuite hnena Dawt hmanga inzuar a, an khingpui te bei ṭhin an ni a, 2023 Mizoram MLA inthlan ah pawh Congress Party hian dawt hmangin Video te siamin mipui a bikin Mizoram Kristian State ah te, Meghalaya ah te, Nagaland ah te nasa takin hma an la ṭhin. A chhanchu Development Policy ah BJP min beih ngaihna an hriat loh vang a ni. Chuvangin India ramah pawh an pawl UPA kalsanin mipui te hnenah I.N.D.I.A tih chu pawl hming tharah an hmang leh ta a, Mizoram ah pawh chutiangin hma an la ve zel dawn tih hi Central lama an hotute hnen aṭanga an thu hmuh a nih dawn avangin Congress Party lakah hian Mizoram mipui te fimkhur hle turin ka chah duh che u a ni,” a ti bawk.
Kumina inthlanpui lo awm tur chungchang sawiin, “2023-ah MLA General Election ah Mizoram ah hian BJP Sorkar Mizoram hnufual tak aṭanga chhanchhuah a nih theih nan kan thlan tlin a ngai a, Sorkar lai MNF Party te’n an tih theih loh te chu BJP Sorkar ah chuan mipui mamawh hrang hrang Central Sorkar hnenah kan dil ve thei tawh dawn a, chumi hmang chuan Mizoram, Kristian rama cheng te hian kan theihna chu khawvel hriatah, India ram mipui hmuhah kan pho lang ve thei tawh dawn a ni. Chuvangin BJP hi Hindu Party ani lova, India mi tupawh in kan chanvo kan chan theihna tur atana awm Party a ni tih Mizoram mipui hriat ah ka puang duh bawk a ni,” a ti.
