Champion kawnghren thar hren tumin Tata SK 612 LPS Pro Fight flyweight-ah vawi nga champion tawh NT Lalbiakkima a tel dawn a, inbuatsaih nan The Punch 10-ah a inlan ang.
Siaha boxer Biakkima’n Pro Fight champion kawnghren hren leh a chak bakah, inhnek tam a duh avangin a tel dawn tih a sawi.
March 12, 2019 khan ‘Title Fight’-ah unanimous decision-in F Zoramchhana a hneh a, a vawi nga nan Pro Fight lightflyweight-ah a champion. Kum li hnuah kir leh turin thutlukna a siam fel a, kum lama naupang zawk boxer tha chhuak thar zel mah se hlauh a nei lo tih a sawi.
Biakkima chuan : “Pro Fight champion kawnghren hren leh ka duh a, kg 52 (flyweight)-ah ka tel dawn. Inbuatsaihna tha ka mamawh avangin inhnek tam ka duh a, tute mah ka hlau lo,” a ti.
2014 khan a vawi khan nan Pro Fight-ah Biakkima a tel a, champion lai Laldinmawia (Tuipui) hnehin kawnghren a chhuhsak. 2015, 2016, 2017 leh 2019-ah title a humhim a; Covid-19 leng vangin 2020 leh 2021-ah buatsaih a ni lo va, 2022-ah tharthawh leh niin a tel ve lo a ni.
Nikumah chiang takin kg 48-52 inkarah Lunglei tlangval Laldinsanga a champion a, a bitum a knockout fai vek. Pro Fight champion a nih hnuah a taksa nena inmil zawk a nih avangin Dinsanga’n bantam huangah a khel zui a, Biakkima nena intawn theih erawh a duh hle.
Pro Fight a khelh chhung zawnga a bitum hneh fai vek Biakkima’n December 2020 khan professional luh chilhin Mumbai-ah Aman Dilawar a knockout a. Vawi li a chak zawn hnuah June 18, 2022 khan Dubai-ah WBC Asian Continental Lightflyweight title chuhin, Filipino boxer Jayson Vayson-a lakah split decision-in a chak lo a ni.
Hemi hnu hian inhnek turin hun tha a nei zui leh mai lo va, LPS Promotion chuan hma lakpuiin The Punch 10-a a inlan tur zingah telh a ni a. Thai boxer Kittipong Jareonroy nen August 26, inrinni zanah Kolkata-ah an inhmachhawn ang.
India rama professional boxing series hriat hlawh tak The Punch-ah hian Biakkima nen Mizo boxer pathum an tel dawn a. Cherhlun chhuanvawr Zotea leh Pankaj Kumar, Omega Lalramdina leh Gugan Kumar an inhnek ang.
Kum khat leh thla hnih hnuah Biakkima a inhnek leh thei dawn chauh a, a lar chhuahna Pro Fight title lak kir leh a tumna kawngah inpuahchahna pawimawh tak a ni nghal dawn a ni.
Organising Committee chuan Title Fight-ah Pro Fight-a tel si lo Mizo boxer langsarte tan professional inhnek zeh tel a tum a. Heta inlan tur zingah hian Biakkima tel mah se, vawi tam zawk inhneka a dinhmun chawi kang leh turin Pro Fight-a tel ngei a duh ta zawk a ni.
