Aizawl March 30 : Vawiin khan ZPM Party Vigilance Department leh Media & Publicity Department te chuan Aizawl Civil Hospital-a CT Scan khawl hun rei tak hman theih loha awm tawh, khawl thar bun (installation) tura hmalak zel dan a hmunah kalin an enfiah. CT Scan dinhmun hi March ni 22, 2022 (Thawhlehni)khan a hmunah kalin an lo enfiah tawh a. Vawiin a karkhatnaah hian hmalak zel dan an enfiah leh a ni.
Hemi chungchanga thuchhuah an siamah chuan, “Tunah hian CT Scan dahna hmun tur hi cheithat mek a ni a. Earthing line pathum leh a chhuat siam zawh tawh niin, vawiin lamah ceiling siam zawh beisei a ni a. Air Conditioner (AC) hman lai hi kum khat vel a chhiat tawh avangin a thar, AC 5 ton hman tura ruahman a ni. Hemi chungchangah hian Medical Superintendent Dr. Thanchungnunga chu thil awmdan zawtfiah nghalin, AC 5 ton hi Mizoram-ah lei tur a awm loh avangin phai lam atanga lei a ngai dawn a, quotation ti tura an inbuatsaih mek thu min lo hrilh. ZPM Party chuan hun rei lote hnuah CT Scan hi hman theih tura peih fel thuai anih kan beisei a, hmalak zel dan kan enzui reng dawn a ni.
“Aizawl Civil Hospital hi mi harsa ten kan pan khawm ber a nih avangin hetianga hun rei tak CT Scan hman theih loha a awm hi mipuiin kan tuar nasa tawh hle a. CT Scan hi a tlangpuiin thlakhatah mi 300 vel bawrin kan hmang anga ngaih a ni a. Tin, CT Scan bakah khawl hrang hrang hman man hi hmun dang aiin 40-50% velin a hniam zawk tlangpui a, tuna a rate hrang hrang en hian hei aia mipui tana zangkhai zawka tih theih niin ZPM Party chuan a ngai,” tiin an tarlang a ni.
