“Pu Lalduhoma’n zin loh bill a la duh leh Sihhmui khawtlang tui a ru duh kha a mak lo a, a inhmeh hle a ni,” VL Krosshnehzova, General Secretary MNF General Hqrs. chuan a ti.
VL Krosshnehzova chuan, “Pu Lalduhoma hian a MLA fund atang hian 2021 – 2022 (kum 2) chhung lek hian dam lo kan nan cheng 16,42,000/- (nuai sawm paruk chuang) a hmang. MLA-in a kanna dawngte hi mi 30 an ni a, cheng Rs. 2,00,000 (nuai hnih) chuanga dam lo kan hi paruk a nei a, a bak chu 5000 chung lamin a kan hlawm a ni. MLA-in dam lo a kanna dawngte kan lawmpui em em a, chutih rual chuan party bil pual leh campaign-na rawngkaiin dam lo kanna duhsak biktea a pe teuh teuh mai hi erawh hriatthiam a har. Bialtu MLA kanna hlawm lian dawng ve pha lote kan lainat hle a ni.
“Pu Lalduhoma hian a fund hman danah hian pawl phuahchawp hming a hmang nasa hle a. Zobawm Welfare Committee, Tualvungi Veng Society, Tlangveng Welfare Committee, Varak Dil Welfare Society, Zion Street Welfare, Saphak Welfare Thenzawl tih leh Welfare hming eng emaw zat a hmang a. Welfare hminga fund tam tham tak tak a pekte hi pawl tak awm lo, phuahchawp an ni hlawm. A veng leh khua mite pawhin hetiang pawl hi a awm an hre lo.
“Pu Lalduhoma hian pawl rintlak tam tak an awm lai leh a khaw neitu, hmasawnna hna thawk tura Agency dik, Village Council an awm reng laia pawl phuahchawp a hmang duh hian a rilru a tichiang hle a. Pu Lalduhoma hian a fund hi Thenzawl bikah phei chuan Village Council 4 awm te hi pakhatmah a pe lo a. Heng Welfare lem hming hmanga hnathawktute hi kalphung thar tlangaupuitu ZPM mi leh sa vek an ni. Party induhsak bikna na takin an kalpui mek a, mipuite’n an aiawha an thlan tlin VC-te pawh an rep char vek duh a. Chuti chung chuan ‘mipui sorkar’ an la tlangaupui ngam hi a huaisen thlak hle. Mipui bum tuma an nih lohna anga inlantir mek ZPM-te hi kan hriatchian a hun hle a ni,” a ti a.
VL Krosshnehzova chuan, “Mipui sorkar kan din dawn, tumah kan thliar lovang’ tia au kuk kuk thin ZPM super CM nih tum hian a sorkar hma hauhin dawt hmangin a fund a sem duh a. Pawl phuahchawp hmang hialin a party bil mite a duhsak nasa hle a. A fund a enkawl duh dan atang hian zin loh bill a la duh leh Sihhmui khawtlang tui a ru duh kha a mak lo a, a inhmeh hle. An ban phak tawka an tih theih china an sulhnu lang reng atang hian, an insawi ang an nih loh zia a lang chiang hle a ni.
“Zoram mipuite hian ZPM kalphung tharah hian beisei tur a awm lo tih hria a, kalphung nghet leh rintlak ‘Pathian leh kan ram tan’ titu MNF-ah rinna nghat ngam turin kan ngen a ni,” an ti bawk.
