Aizawl, 8th September, 2023: Vawiin khan ZPM chuan party office-ah Political Session kan hmang a, he huna thusawitu Dr. Jeffrey R. Lalramdina chuan, “ZPM hian ṭhalaite eizawnna tur a ngaihtuahin a vei hi ka lawm tak zet a, ka eizawnna leh ka tuina lam a nih avang hian ZPM a ka awm chhan pawh a ni. ZPM hi chuan a sawi a sawi ringawt hi kan ti lo, a tih a tih lam hi kan ti zawk ṭhin,” a ti.
Dr. Jeffrey R. Lalramdina chuan, “Tunlai kan ramin kan buaipui em em chu thalaite eizawnna a ni a, ram dangah hian thalaite’n zaa 35% velin hna an hmuh loh chuan an ralkhel viau zel a, kan ramah chuan kan muang suah mai chu a ni a. ZPM hian a rawn hmufiah ta chat a ka lawm em em a, hei tak hi ZPM ka awm chhan pawh a ni. Mizoram State sawrkar hnuaiah chuan hna a awm hleithei tawh lo tih kan hrethiam vek a, a awmchhun te pawh tute emaw inchuh zawh te a lo ni tawh a, amaherawhchu Central sawrkar hnuaiah chuan hna hi a tam em em a ni. Mizoram thalaite hian skills kan mamawh hi kan nei tlat lo, a chhan chu kan zirna hian min pe tlat lo hei tak hi a ni pawi em em mai chu, JJ Personality-ah hian hna hi kan chhuah thin a, hnamdang thalai te hian hna hi an rawn dil nasa em em a ni. Hna an rawn dil hian engkim hi an ti thlap thlap mai a ni. Mizo thalaiten hetiang lam zirna kan nei lo lutuk hi ka hmangaih vang che u in ka sawi duh a hna zawn skills hi kan nei lo a ni. Thiamna pawchhuak lo zawnga lehkha kan zir mai mai hi a pawi ka ti khawp mai, central lamah hian railway, sipai lamah sang rual hnathawh tur tha si hi a tam lutuk a ni. Exam tura inbuatsaihna tha te, interview hmachhawn dan te kan thiam lo lutuk hi a pawi em em a ni. A chhan chu zirna kan nei tlat lo a, system dik lo tuartu kan nih vang a ni. Heng zawng zawng hi ZPM chuan a rawn ngai pawimawh em em dawn a, chuvangin ZPM hi kan sawrkar tir ngei ngei a ngai a ni,” a ti.
Pu Jeffrey chuan “Eizawnna han tih hian mi hnuaia inhlawh ringawt hi eizawnna a ni lo a, entrepreneurship mimal eizawnna hi a pawimawh em em a ni. Ram inkaihhruaina tha a awm a nih ngat chuan mimal a eizawngte hi kan ram kalsiam atana pawimawh ber te kan ni. Tun dinhmunah hi chuan kan sawrkar neih tawh zawng zawng te hian mimal a eizawngte an than lenna tur an beng hniam char char a, hei hi a pawi khawp mai, engtin nge kan ram a than ang. Ram fing zawng zawngin thuvawn an neih chu, ram economy banpui pathum pawimawh zinga pakhat chu mimal a eizawngte an ni, an ti a ni. Kan ramin a pawimawhna kan la hre ve lo hi a vanduai thlak tak zet a ni. ZPM chuan heng mimal eizawngte hi a ngaihpawimawh tur a ni. ZPM kan thlang tling a nih chuan thlaite IAS, IPS, IFS officer kan nih theihna tur hi tha tharin theihtawpin kan zawng dawn a ni. MNF hian super IAS te an buaipui a, tha viau angin lang mah se sum tam tak sengin an hlawhchham a ni,” a ti.
ZPM Party Political Session hi Pu R. Lalthanmawia, General Secretary chuan a kaihruai a ni.
