Saipum 19th September 2023 : Nizan September 18, 2023 (Thawhtanni) zan khan Serlui Constituency huamchhung Saipum khuaah vantlang inkhawm neih a ni a. He hun hi K. Enhluana, Campaign Committee Chairman-in a kaihhruai a ni.
He hunah hian ZPM zawm thar mi 44 Pu K. Sapdanga, Working President chuan a lawmlut a. Headquarters hruaitu leh Unit hruaitu mi thahnem tak an tel.
K. Sapdanga chuan thusawiin, “Serlui bial mipuite zaninah hian in vanduai a, in vannei bawk a ni. Hun rei tak he bial lo ngaihven a, lo duhsak em emtu Pu Jimmy Laltlanmawia chu ZPM Candidate turin puan a ni a, vanduaithlak takin damlohna avangin in lo ngainat em em Pu Jimmy-a chu thlak a lo ngai ta tlat mai a, kan hruaitute hnenah a din theih loh tur thu a rawn thlen rualin, a sulhnu chhui tura a mi rin ber Pu C. Lalthanfela chu he biala ZPM Candidate tura ruat a ni leh ta a. Pu Fela hi ZPM a din tirh atangin rinawm leh taima taka ram tana inpe, pa nelawm tak, tawng tam lo, dik nia a hriatah chuan huaisen taka kal ngam thin mi, YMA hruaitu hlun, Kohhran leh khawtlang tana mi inhmang tak, rinawm taka zirtirtu hna thawk a, ram leh hnam hmangaih vanga Voluntary pension-a chhuak a, ZPM rawn zawm a ni a, Headquarters pawhin kan mi rin em em, MLA atana kan awh em em mi a ni. Vawiinah Serlui bialin hetiang mi candidate in nei hi a lawmawm hle a. In thlang tling a nih chuan in inchhir hauh lovang tih hi ka sawi duh a, sum leh paia rinawm, a tih tura hotuten an ruahman tawh chu sawisel nei lova huaisen leh taima taka thawk thin a ni,” a ti.
K.Sapdanga chuan, “ZPM sawrkar hunah chuan MLA ten Car thar leina tura sum tam tak senga sawrkar thar a nih veleh an lei nghal ngawt ang hi a ti ve dawn lo va, inremcham chungin ram tan hna kan thawk dawn a, tute emaw sum siamna atana sawrkar sum ren lo taka hman ang chi hi kan ti ve ngai dawn lo a ni. Sawrkar kalphung hlui hi vuiliam kan chak ngawih ngawih a, dik lo leh fel lo huaisen taka hnawl ngam turin i tangrual ang u. He bialah hian MLA kan thlang dawn a ni satliah lo, sawrkar thar kan tuak dawn a ni. Kan Candidate hi a lo pachhe deuh a ni thei e, vote kan thlak hian Chief Minister tur kan vote tel tih hria ila, kan thlawhhma kawng te, kan khaw kar kawng te hi kan vote tel tih i hria ang u. He inthlan lo awm turah hian leiba min siam belh thur thur tur nge kan vote zel dawn a, inrenchem taka ram kaihhruai tum te kan vote dawn tih ngaihtuah ila, kalphung thar mipui sawrkar tuakchhuah puiah ka sawm che u a ni,” a ti.
