Vawiin khan Press briefing for Mizoram Journalist’s Association neih a ni a, he hunah hian TB vanga damlo damdawi ei lai reng reng an thih chuan TB vanga thi a chhiar tur anih thu tarlan niin, kum 2023 (Jan – June) chhung khan Mizoramah TB vanga thi mi 62 an awm hman a. Nikum khan 74 an thi bawk a ni.
TB damlo zinga HIV vei zat chu kum 2023 (Jan – June) chhung vek hian 12% an awm a, nikum lamah 15% an ni bawk. Hetihlai hian nikum khan TB vei 2081 an awm laiin kumin Jan – June khan mi 1144 an awm thung a. TB damlo tihdam zat hi 83% niin nikum khan 87% enkawl dam an ni bawk.
TB natna hi India ram atanga 2025 ral hma ngeia umbo tum a ni a. 2015 a TB vanga mitthi kan neih zat atanga chhutin 100 zelah 90 in a tlahniam tur a ni a. (Mizoramah chuan 2015 khan TB vanga thi mi 38 kan nei a, 2025 ah chuan TB vanga thi hi mi 4 chauh awm tawh tur a ni). 2015 a TB kan neih zawng zawng zat atanga chhutin 100 zelah 80 in a tlahniam tur a ni a. (Mizoram chuan 2025 khan TB damlo mi 2088 neiin, 2025 ah chuan TB damlo 417 chauh nei tawh tur kan ni.)
TB natna hi ei leh in hmu tha lo/ei lo te nen hian a inkungkaih thuk hle a. Ei leh in tha hmu lo/ei lo ten TB an vei duh bik a, chutiang bawkin TB damlo te pawn an damloh chhung a ei leh in tha an hmuh loh/ei duh loh chuan an dam muang thei a. Sawrkar pawhin hei hi ngai pawimawh in TB damlo ten TB an vei chhunga an ei leh in tih that nan Nikshay Poshan Yojana scheme kaltlangin an bank account ah thlatin Rs.500 a pe thin a ni tih tarlan a ni bawk.
Ni-Kshay Mitra atana inziak lut duhte chu a hnuaia district TB office contract number-ah hian in-report tur a ni.
