Champion lai panga zinga pathumin hming an pe lut a, hun tawp thlengin Tata SK 612 LPS Pro Fight-a tel tumin boxer 395-in lehkha an theh lut.
Nilaini thleng hun hawn a ni a, hun hnuhnungah welterweight champion lai C Lalhruaitluanga leh vawi nga champion ni tawh NT Lalbiakkima’n hming an pe lut.
Champion lai panga zingah bantam-a insawn tumin fly champion Laldinsanga a tel dawn. Nikuma best boxer Ramthar Lunglei tlangval hian professional vawi nga khel tawhin hnehna a chang vek a, tun tumah pawh ngaihven hlawh tur zinga mi a ni.
Bantam champion Lalrinngheta’n light title chuh a tum ve thung a, kum 21 mi Tuipui boxer hian nikum Pro Fight atangin professional a luhchilh a, vawi thum inhnek tawhin a chak vek a ni.
Hruaia’n welter kalsanin middleweight-ah chona thar hmachhawn a tum a; kum 25 mi Chawngtlai boxer hian professional-ah hnuhma tha tak neiin vawi ruk a khelh tawhah chak vekin mi pathum a knockout.
Champion lai zingah featherweight title kawltu Lalrosangzuala leh light champion Vanlalawmpuia’n lehkha an theh lut lo. Rosanga hian mi mal hna avangin harsatna a nei a, Awpa’n light title humhum tum hman mah se a rilru thlakin WBC India title chuh dan kawng a dap a, tel turin hming a pe lut ta lo a ni.
Hetih lai hian champion lai mi pathum bakah champion tawh mi pathum an inlan dawn. 2022 khan New Siaha chhuanvawr Biakkima a tel lo va, tun tumah Pro Fight chanchina vawi ruk champion hmasa ber nih tumin fly title a chuh ang.
2019 middleweight champion C Lalduhawma’n middle champion nih leh ngei a tum bawk a, nikum khan middle telh a nih loh avangin a tel lo. Kum 26 mi Ramhlun South boxer hi professional boxing a khelh tawh vawi hnihah knockout-in a chak ve ve a, Hruaia nen an intawng thei dawn a ni.
2015 bantam champion HC Lalramfela’n weight hrang pahniha champion tumin fiahna a hmachhawn leh dawn. Kum kal ta khan light title fight-ah Awpa a hneh lo va, kuminah bantam champion Rinngheta nen light champion nih tumin weight khatah an awm dun hmel viau a ni.
Kum kal ta khan boxer 211 an tel a, kuminah 395 inziak lutin kar leh thawhlehni zing dar 8 atangin LPS Huan, Falkland Vengah an hriselna endikin an inbuk ang.
An inbuk zawhah tel tur zat dik tak a chiang dawn a, September 30 inrinniah LPS Office, Zarkawtah fixture tar chhuakin October 2 zanah inhnek tan a ni ang.
