Tata SK 612 LPS Pro Fight champion nih tumin boxer 395-in hming an pe lut a, an inbuk zawh hnuah khel thei tur zat a chiang chauh ang.
September 26, thawhlehni zing dar 8 aṭanga chhun dar 12 thleng LPS Huan, Falkland Veng, Aizawlah an hriselna endik hmasain an inbuk dawn a. Thuneituten boxer tana pawimawh an hrilh hre nghal ang.
September 30, inrinniah LPS Office, Zarkawtah fixture tar chhuah a ni ang. Fixture siam dan turah boxer-te hlawm hnihin tawn hriat nei lo leh nei tawha ṭhen hran tur an ni a, weight khata tel an tam dan azirin tawn hriat nei lote an inthlifim hmasa dawn a ni.
October 2, thawhṭanni zanah ṭan a ni dawn a, Sports Minister Pu Robert Romawia Royte chuan a hmanpui ang. Hawnna inkhawmah Ring Announcer ni ṭhin Joy Zairemmawia sunna hun hman a ni bawk ang.
Zah hnih awhin weight hrang pangaah Title Fight buatsaih a ni dawn a, fixture a la chhuah loh avangin a hun tur hriat theih a ni rih lo. Professional inhnek dang pali awm tel tura ruahman a ni a, indawr mek niin tihfel vek theih a la ni rih lo bawk a ni.
WBC title chuhna inhnek pathum awm thei turin Organising Committee chuan ruahmanna a siam a. 2019 Pro Fight bantam champion Laldingliana’n WBC Asia continental emaw India emaw a chuh dawn.
Organising Committee member Dr Lalmuanpuia’n sanction a tumsak theih dawn avangin Tuipui boxer Dinga’n WBC Asia continental super bantam champion lai Jon Jon Jet (Indonesia) a hnek theih nan kawng zawn a ni a, a hlawhtling ta lo a nih pawhin WBC India bantam title a chuh dan tur ruahman sa a ni tel.
East Tuipui bialtu MLA Pu Ramthanmawia’n Pro Fight light champion lai Vanlalawmpuia’n WBC India super light a chuh theih nan sanction lakna a tumsak a, Cherhlun tlangval F Zoramchhana’n WBC India super bantam a chuh theih nan GIG Motors neitu Pu John Lalpeka’n sanction lakna senso a tum ve thung.
Pro Fight-a vawi nga champion tawh HC Johnkenty Vanhlimpuia’n professional boxing a luhchilhna tur kawng hawn a ni bawk. Indian Navy lam aṭangin inhnek phalna hmu tawh mah se November 20 aṭanga khelh tur Services Championship-ah a tel dawn a, a hun chungchangah harsatna a awm thei dawn em tih a la hriat loh.
Pro Fight fixture tihchhuah a nih hunah Tuipui chhuanvawr Vana leh WBC title chuh tum Dinga, Awpa leh Zotea te inhnek hun tur a chiang thei chauh dawn a; hei vang hian October 2 zanah anniho dinhmun tur hi tihfel a ni ang.
