September 27, 2023 (Nilaini) hian Mizoram Pradesh Mahila Congress Committee huaihawtin Mahila General Conference, Vanapa Hall, Aizawl-ah neih a ni a. He hun hi MPCC President Lalsawta, Vanlalawmpuii Chawngthu, Mahila President, Dr. Lalmalsawma Nghaka, Treasurer, CLP Leader Zodintluanga Ralte leh Mathew Antony, Observer, AICC te’n an hman pui.
MPCC President Lalsawta chuan, Hmeichhia te hian thil tha tam tak danglamna an thlen theia, vawiinah hian Mahila ten danglamna an siam mek a ni, tih sawiin, Hmeichhia te hian kan ram kan hnam, kan sakhua chhanhim turin nasa zawka tanlak a ngai. India ram Independence kum 1947 atanga vawiin kum 76 chhung hian India ram mipui tana hun khirh leh kan hma lam thim ber hun kan thleng mek a ni. Kan inlungrualna te, mahni hnam leh sakhua theuhah lungmuang leh nuam ti taka kan lo awm thinna chu nuai chhiat a ni zo a. Mahni rama mikhual dinhmun pawh tluk loa awm thei kan ni mek, a ti a.
‘Muslim chu Pakistan-ah, Hindu chu India-ah tih ngaihdan tuai thar a ni a. He BJP hmalakna hlauhawm tak India ram chu Hindu ram (Hindu Rashtra) a siam tumin ke a pen mek a. An thil tumah hian hlawhtling ta se Mizo Tribal te hi Social Strata-ah khawiah nge kan awm ang? Hei hi mipui chakna leh vote hmangin kan ti danglam thei a, kan thlak danglam dawn a ni, a ti.
Lalsawta chuan ‘Kan ram, kan hnam leh kan sakhaw himna tur hian Mizo mipui hian BJP thawhpui ngai lo tur Congress Party kan thlan tlin a, kan tih chak a ngai’ a ti a. India ram state hrang hrangah BJP hnawlna thli a tleh a. South India lamah phei chuan BJP sorkarna a awm tawh lo. India rama Political Party lian 26 tangrual Congress Party hruaina hnuaia insuihkhawm I.N.D.I.A (National Developmental Inclusive Alliance)-in vote vbch 65 chuang an nei a, BJP leh a thawhpui party tenau-in vote vbch 23 an nei. Hei hian Congress a sorkar ngei dawn tih a chiang, a ti.
Lalsawta chuan Congress party in Mizoram chhan tura thawk tura in pe mi tha tak tak kan nei zel, hei hi keimahni tih a ni lo, thawktu a awm a ni, tih sawiin, Kan ram himna tura thawk turin Party pathum, Congress, ZNP leh PC ten Mizoram Secular Alliance kan din a. Hei hi chak taka kalpui a ngai. ‘Min enchhin turin tih mai mai’ a hun tawh lo. Kan ram leh hnam humhim a, kan sakhua kan humhim theih nan lo kal a, lo tel turin ZPM leh MNF pawh lo tel ve turin kan sawm tak meuh meuh che u a ni, a ti bawk.
Mahila President Vanlalawmpuii Chawngthu chuan, Hmeichhia te hi a tha zawnga danglamna siamtu kan ni thei. Pathianin min chhandam tura Lal Isua a rawn tirhna kal kawng chu Hmeichhia, Mari a ni. India Prime Minister hmingthang zing lar tak chu hmeichhia Indira, Gandhi a ni a. Tuna India ram Politician, hnam hnuaihnung leh sakhaw tlem zawk te humhalhtu Congress party hruaitu pawimawh chu Sonia Gandhi a ni bawk. West Bengal Chief Minister, West Bengal fanu an tih hial chu Mamata Banerjee a ni a, Myanmar ram zalènna sualtu ropui ber nia khawvelin a hriat chu Aung San Suu Kyi a ni bawk. Hei hian hmeichhia te hian danglamna kan siam thei a, Mizoramin sorkar tha kan neih theihna tura danglamna hi kan siam a tul a ni, a ti.
Vanlalawmpuii Chawngthu chuan Mizoram hian tawngkam thiam, thusawi thiam leh mi thawmna tak tak kan mamawh lo a, ram hruaitu turin an tha lem lo. Cuban President Fidel Castro te, Uganda President Idi Amin, Zimbawe President Robert Mugabe, Adolf Hitler te leh Iraq President Saddam Hussein te pawh an thawm a na a, an chakin mipui rilru hneh leh thunun taka thusawi pawh an thiam hle. Mahse an hun chhungin ram mipui tawrhna nasa takin a thleng. Mi chak nazawng an huaisen lo va, thawm ring leh thusawi thiam nazawng an rintlak chuang lo tih a chiang a ni, a ti.
Vanlalawmpuii chuan Kumin kum tàwpah MLA kan thlang dáwn. MLA kan thlan hian Chief Minister tur kan thlang tel tih kan hriat a ngai. Tun hnaiah Kristian te’n Kristian lo Chief Minister kan awt lek lek. He rualawhna hi Congress Party chuan mi rinawm leh rintlak Pu Lalsawt hmangin kan thaibo dawn, tih sawiin, “Mi thenkhatin enchhin chungchang an sawi. Tuna kan chief Minister Pu Zoramthanga kan hria, heti hi a nih dan a ni. Pu Lalduhoma hi MLA leh MP ah kan enchhin tawh. A hun chhung, MP leh MLA a nih laia ban ve ve a ni a, Zin loh bill lak chungchangah hming a chher bawk. Pu Lalsawta hi MLA leh Minister ah kan enchhin a, a hun chhungin Thlarau MR a nuai bo a, Mizoram sum dinhmun nasa takin a siam tha bawk. Chuvangin Chief Minister tur kan enchhin dawn a nih chuan mi kutfai, mi huaisen, a kalna tur kawng hria, a thusawi dingnghet, mi dik leh rintlak, Zin loh bill la ve lo Pu Lalsawta hi Chief Minister atan enchhin tur dik a ni. Mizoram tana Sorkar tha siam turin sum leh pai kan nei lo. Pathian kan rinchhan a ni, a ti bawk.
Lalremsiami, Vice President, MPMCC kaihhruainain Resolution pass a ni bawk.
RESOLUTION
1. Hmeichhia tena ram rorelna kalpuina kawngah thuk zawka thuneihna an chan theih nana Parliament in Women’s Reservation Bill, Lok Sabha leh State legislative Assembly-a hmeichhiate tana seat 33% hauhsakna tur a pawm fel ta chu lawmawm kan ti a. Hmeichhiate tana quota a awm theih nan hian Congress party chu a sulsutu ber a nih reng a vangin lawmawm kan ti a ni.
2. 128th Constitutional Amendment Bill, 2023 (Women’s reservation) tuna kalpui nghal lova BJP tena delimitation exercise leh census neih fel hnua kalpui chauh tura an ti erawh hmeichhiate hmakhua ngaih tak taklohnaah kan ngai a, kan dem hle a ni.
3. MPCC Election Manifesto Ṭang Puihna hi din chhuah tum tak taka ṭang, ṭhalai, kut hnathawkte, ṭan ngaihna hre tawh lo khawpa dinhmun tleu tawhte leh kawng hrang hranga eizawngtute tan ṭha kan ti tawk a ni.
4. Pu Lalsawta, MPCC President kaihhruaina hi kan ring tawk a. A kaihhruaina hnuaiah Sawrkar ṭha leh thianghlim, Zoram mipui mamawh kan siam ngei ang.
5. Mizorama party hrang zingah kan ram, kan hnam leh sakhua a him theih nan, Congress Party-lo chu Party dang an awm loh avangin Pu Lalsawta kaihhruai Congress Party hi kan ring tawk a ni.
