Congress Lagislature Party Leader Zodintluanga chuan, “Mizoram-ah drug a hluar hle a, tichung chuan he harsatna chinfel a nih theih nan MNF sorkar chuan fund a dah tam lo va, ruahmanna tha pawh a nei lo,” a ti.
Zodintluanga chuan, “Kum 2018 inthlan dawn khan MNF te hian drug rehabilitation lamah hmalakna kan kalpui ang an ti a nih kha. Tunah an hun a tawp tep tawh a, drug lama harsatna chingfel turin hmalakna liantham an nei hauh lo. MNF rorelna hnuaiah drug supply tihtawp aiin a pung zawk a. Substance abuse pawh thalaiah a nasa zual zawk bawk a. Nunna chan pawh an tam tial tial zawk a ni.
“Damdawi hman khawloh avangin Kum 2019-ah Mizo thalai mi 55 in nunna an chan a, kum 2020 ah mi 67 in an chan a, kum 2021 ah mi 47 in nunna an chan a, kum 2022 ah mi 43 in nunna an chan bawk a. Kum 2023 ah hian September thla thlengin mi 47 in nunna an chanphah tawh.
“MNF tena drug smuggling an thunun theihloh avang hian tun hnai MNF kum nga chhung sorkar laiin thalai nunna chan 259 an awm phah tawh a. Heng thalaite nunna chanah hian tu nge mawhphur? Thalai te drug addict an nihnaah tu nge mawhphur?
“State-a MNF sorkar leh Centre-a BJP sorkar te hian drugs tawlhruk an thunun thei thlawt lo va, a pung zual zel zawk bawk. Kum 2022 bik khan heroin 152 kg lawih man a ni a, kum 2023 thla kua chhungin heroin 150 kg man a ni der tawh.
“Mizoram thalaite tihchhiatnaah hian tu nge hlawkna tel? Tute nge drug sumdawnna hi kalpui tu te? Eng vangin nge MNF sorkar hian a hriatfiaha aman theih hauh loh? A remtihna hnuaia kal zawk em ni?
“Drug supply tamna chhan hi pahnih chauh a awm thei – MNF sorkar in a thunun thei thlawt lo (chutiang a nih chuan sorkar zui zel tlak a ni lo) tih leh drug cartel-ah hian telin thalaite tihchhiat pawisa lovin sum siam nan an hmang em ni tih a ni. INC tena thuneihna kan chan chuan chhui chian vek a ni ang a, mawhphurtute hrem lohin an chhuak lovang,” a ti bawk.
Zodintluanga chuan Kuhva chungchang pawh sawiin, “Dan bawhchhiaa Myanmar atanga kuhva tawlhrukin kan kuthnathawktute nasa takin harsatna a thlen a. He mi chungchangah hian Congress party chuan Prime Minister hnenah lehkha ziakin kuhva smuggling titawp tura hma la turin ngenna pawh kan siam tawh. Ministry of Home Affairs, Govt. of India pawhin Mizoram Chief Secretary pawh lehkha thawnin Kuhva smuggling titawp tura hma la turin a hriattir tawh bawk.
“Chuti chung chuan MNF sawrkarin kuhva smuggling titawp tura tihtakzeta hma a lak duhloh avangin kuhva smuggling ala kal reng a ni. sawrkarin hma a lak that duhloh avanga kuhva chingtute’n an ei leh bar zawnna humhim tura anmahni kutkawiha hma an lak a ngai thin te hi a lungchhiatthlak tak zet a ni.
“Mizoram ah hmasawnna a awm ngai lo tia an dawt sawi hi a dik lo. Aizawl tui lak phase 1 leh 2 te, tun hnai lawka hawn 37 MLD Water Treatment Plant te, Airport te, Medical College, Vety College, Horticulture college te pawh Congress sawrkar laia din a ni a. Mizoram Hydel Project hmasa ber Tuirial Hydel Project te pawh Congress hunlai a din a ni. Mirethei tam tak in kan sak sak bawk a ni,” a ti bawk.
