October 9, 2023 (Thawhtanni) zan dar 8:00 khan Aizawl North-III Block Mahila Congress Committee (BMCC) bultumin Edenthar BSUP ah hun hman a ni a. He hun hi Lal Thanzara, Sr. Vice President MPCC leh Aizawl N-III INC Official Candidate ni bawkin a hmanpui a ni.
He huna thusawitu Lal Thanzara, Sr. Vice President MPCC chuan BSUP te’n MNF sorkar hnuaiah tui (water) in tlachham tih kan hria a. Sorkarna min pek chuan in harsatna hi, “Kan ti ang kan tih chu ti mai ṭhin Congress Party hian kan rawn phuhrûk sak dawn che u a, kan ti hlawhchham lo ang che u,” a ti.
Kum 2023 MLA General Election lo awm turah hian Party dang kan elpui te pawhin an rawn hmu ang che u, an rawn hmangaih thar thut dawn che u. Mahse, chu chu hmangaihna tak tak a nih leh nih loh lo finfiah rawh u. BSUP din saktu che u Congress Party hi lo thlang tling leh ṭheuh turin ka ngen che u a. In tan a nih piah lamah Mizoram mipui tan Sakhaw zalenna duhtu Congress Party hi Pathian rinchhanin kan ding leh dawn a ni, a ti bawk.
MNF Party hian an intiamna pakhatmah tihlawhtling lovin an sorkar hun chhung an liampui dawn a. SEDP Nuai thum (3) an intiam chungin cheng Sing hnih sangnga (25000) chauh an sem a. An vanduai a, mifel MLA ṭha tak tak an nei chungin mipui rintlak sorkar an nih lohzia a lang chiang hle a ni, a ti.
Lal Thanzara chuan MNF sorkar hnuaiah Pu Zoramthanga hova kuttling lova sum lak a tamzia te, Vai Contractor an hausakzia te hi Mizoram mipuiin ngaihtuah chiang ang u. Kawngchhawng pawh a awm tawh em ni? Tin, North East Democratic Alliance (NEDA) a BJP an thawhpui aṭang hian an inhnukdawk tawh em? Chu chu i zirchiang ang u. VOTE nachhan tur in la neih chuan lo Vote leh chhin mah rawh u, in ti fuh hauh lo ang tih ka ring a ni, a ti bawk.
ZPM pawhin kalphung thar an ti a. Min chhin rawh u an ti thin a. Chief Minister-a an tawktarh pawh Pu Lalduhoma a ni. A Party din ngei pawh chhuahsan duhtu hi kan enchhin a ngaihna a awm lo a. Mizoram mipute’n enchhin hi kan ba lova, a thusawi tam tak leh amah a dik tawk lohzia hi enchhin ngai lovin a lang sa tawh a ni, a ti bawk.
Lal Thanzara chuan, India ram pumah Hindu Lal ram din tumin BJP te an buai mek a. Kan thenawm State-ah an nihdan dik tak kan hmu tawh a, kan ramah ngei hian bû khuar tumin tan an rawn khawh mek a ni, a ti a. Forest Ammendment Act-te pawmin; Kristian-te tana chanchinṭha puangtu Missionary-te dinhmun an ti chêp mek bawk a ni, a ti a.
Lal Thanzara chuan Jakoba 4:7 Chutichuan, “Pathian thu thuin awm rawh u; amaherawhchu Diabola dodal rawh u, tichuan a tlan bosan ang che u,” tih sawi chhuakin, Kristian tana him lo sakhaw zalenna ngai pawimawh lo tu BJP leh a thawhpui MNF te hnawl an ngai a. Nakin lawka BJP thawhpui tumtu ZPM pawh hi Mizo Kristian-te hian kan hnawl a ngai a ni, a ti bawk.
He hun hi Laldinpuii, President Aizawl N-III BMCC in a kaihruai a. Lalrintluangi, GS BMCC in hunserh hmangin; Nl. Rosy-i leh Nl. Lalramengi’n kalkhawm mipuite zaiin an awi a. Pi Lalrampari, Vice President Aizawl N-III BMCC chuan lawmthu a sawi bawk a ni.
