Aizawl 10th October, 2023: Vawiin October 10, 2023 (Thawhlehni) hian ZPM thlawptu MLA panga – Pu Vanlalhlana, MLA Aizawl North – I, Dr. Vanlalthlana, MLA Aizawl North – II, Pu Lalchhuanthanga, MLA Aizawl South – II, Pu VL Zaithanzama, MLA Aizawl West – III leh Pu C Lalsawivunga, MLA Aizawl South – I te chuan Assembly Speaker Pu Lalrinliana Sailo hnenah MLA an nihna atanga banna an thehlut a, Assembly Speaker hian an banna lehkha thehluh hi a lo pawm sak nghal a ni.
Heng MLA panga te hian Danin a phut anga MLA atanga banna thehlut an ni a. Kum 2018 MLA General Election dawna ZPM in Election Commission of India hnen atanga recognition an hmuh hman tak loh avanga ZPM Support Independent Candidate a dinga tling ta te an ni a. Tun tum 2023 MLA General Election lo awm turah hian an bial ngaiah theuh ZPM Official Candidate niin an ding leh vek dawn a ni.
Vawiin October 10, 2023 (Thawhlehni) hian ZPM chuan tun tum MLA General Election lo awm tur atana bial 39 a an candidate tur an puan tawh bakah, an la puan ve loh, 36-A/C Tuichawng biala ZPM Official Candidate tur an ti fel a. He biala ZPM Party Candidate tur hian Shri. Shanti Jiban Chakma S/o Ranga Chandra Chakma, Ex – CEM, CADC leh Chakma District Council, ZPM President ni lai chu ruat a ni.
Sri Shanti Jiban Chakma S/o Ranga Chandra Chakma hi GeragulukSora, P/S Borapansury, Lawngtlai District, Mizoram a khawsa a ni a. Thiamna lamah, H/S Arts (Cachar College) Silchar, Assam, BA Hindi Praveen Mizoram Board of Hindi Propagation Mizoram, Aizawl niin, pawl hrang hrangah in hmangin, President Branch YCA Gerakuluksora te, President, All Assam Chakna Student Union leh General Secretary, Silchar Chakma Student Union nihna te, Barak Valley Development Committee Member, Central Young Chakma Association ah Member nihna te a lo chelh tawh a.
Chakma District BJP President lo ni tawhin, MDC-ah Chotapansury bial atanga thlantlin niin, Chief Executive Member, CADC nihna te, Vice Chairman, Planning & Development Committee, CADC mawhphurhna te pawh a lo chelh tawh a, tunah hian Chakma Autonomous District Council-ah ZPM President ni lai mek a ni.
