Vawiin ni 18 October, 2023 (Nilaini) chawhnu dar 2pm hian Ngopa MNF Campaign Office chu Lengteng bial MNF Official Candidate Dr.L.Thangmawia’n a hawng.
Dr.L.Thangmawia chuan thusawiin, tun hi ka vawi 4 dinna tur a lo ni ta reng mai a, Pathianin min hruainaah lawmthu ka sawi a, Ngopa khawtlangin chakna min pek avang pawhin ka lawm a, MLA ka nih chhungin in rilru tihnat leh induh loh zawng tih ka nei anih chuan in ngaihdamna ka dil a, hrileng leh hun harsa tam tak karah kan thawhhonaa ka tih tur tih loh ka nei a nih pawhin inngaihdam ka dil bawk a ni, a ti.
Dr.L.Thangmawia chuan, MLA ka nih chhunga Ngopa Welfare nena thawhhona tha tak kan neih avangin an chungah lawmthu ka sawi a, Saitual to Saichal Road te, Lengteng biala a hmasa ber turin Science leh Commerce-te awm tawhin, Higher Secondarry School pawh provincialize a lo ni ta a, KLTM school pawh theih ang angin MLA fund atangte in ka pui a. Min thlangtling leh anih chuan KLTM High School hi kum 3 chhungin kan sa zo vek hman ang tih hi ka sawi duh a, Ngopa BDO Office building sakna turin cheng nuai 207 a fel tawh a, kumtharah chuan BDO Office building thar kan nei tawh ang a. Ngopa ah Sub-Centre leh Health Clinic Center-te, Ngopa Chhim veng Hall leh SDEO Office-te tih puitlin a ni tawh bawk a. MLA ka nih chhunga ka hmalaknate hi kan zavai atan a ni a, lawmman pawh kan za vaia lak a ni. SDO(C) te function tha tawhin driver tur pawh lak belh a ni tawh a. Building pawh ka tling leh anih chuan hmun dang aia tha in sak kan tum bawk ang. Hun tha zawk min pe leh anih chuan Ngopa mipuite min tawiawm tha a, tuna kan la tih hman loh tam tak te hi tih leh ka tum bawk ang, a ti bawk.
Lengteng bial MNF Official Candidate chuan, MNF kan sorkar leh dawn a, Ngopa-ah hian Inter-Border Trader siam nan cheng nuai 600 leh NABARD atangin cheng nuai 800 pawh tihfel ani tawh a, heng zawng zawng hi in mi tawiawmna a tihlawhtling tur hian ka symbol Arsi a rawn chhu leh hram turin Ngopa khaw mipuite ka ngen leh tak meuh meuh che u a ni, a ti bawk.
Pu Zodinpuia MNF Thalai Hqr.Vice President pawhin thusawiin, ram pum thlirin MNF lo chu sorkar tur an awm lo a, hripui leh harsatna hrang hrang karah in bialtu MLA hian a ngaihsak em em che u a, Mizoram MLA zingah hian Dr.L.Thangmawia aia bial ngaihsaktu hi an awmlo a ni, a ti.
Pu Zodinpuia chuan, ZPM hi hruaitu fel tak tak nei ni mahse, MNF leh Congress atanga chhuak vek an ni a, an bial ngaia ding ngam hi an awm ngai mang lo. Congress nise beisei tur an awm lo a, 2024 a an party inthlan tur chiah an thlir a ni, a ti bawk.
