Vawiin ni 19.10.2023 (Nilaini) hian Serchhip District Congress Conference, Serchhip Bazaar ah hman a ni a. He hun hi Congress rorelna CWC member Pu Lal Thanhawla’n a hmanpui a. MI thar 242 a lawmlut a. Serchhip District Congress in Serchhip District kum 25-na Champha lawm nan District petu Pu Lal Thanhawla chawimawina hun an hmang bawk.
He huna thusawitu Pu Lal Thanhawla, CWC member chuan, “ZPM in kalphung thar an sawi a, an kalphung hlui hi enge niang? Val Upa Council leh tih loh atana an sawi ang apiang an ti leh vek bawk si a, khawilai hi nge kalphung thar hi ka la hmu lo. Kalphung tharah chuan hamthatna dawn theih zawng zawng hmanhmawh taka dawn zung zung hi a ni ber. Kalphung thar chu tih loh tura sawi tih leh si hi a ni, a ti.
Pu Lal Thanhawla chuan, India ramah sakhaw zalenna kan neih theih chhan chu Congress a ni. Tunah BJP sorkarna hnuaiah India ram hmun hrang hrangah Kristian te an chep hle. Manipur bikah pawh Kristian te chungah harsatna nasa takin a thlenga a. Kristian te tum bik an ni a. Inkhawmna mumal pawh an nei thei lo. Heti khawpa Manipur a buai a, Kristian Biak In te suasam a nih lai pawhin Prime Minister Narendra Modi chuan engahmah a ngai lo. He BJP sorkar hnuaiah hian Kristian te leh sakhaw dang an him loa, Hnam tenau zawk chimral tumna a lian hle. Congress chuan sakhaw tih bik neih hi a dodal a. Mizoram mipui pawhin kan sakhua leh kan hnam a him theihna turin eng party nge chawilen ngai tih ngaihtuah a hun. Vote thlakna tur uluk loh nasa taka tuartu chu Manipur state atang pawhin a chiang a ni ,” a ti.
Pathianin Congress Party min chawlhhahdam tir a. MNF unau te an lo sorkar a. Ram leh hnam tana an hnathawh hmasak ber chu hming thlak a ni. MNF in Ar vulhna atan maia an chhuah, Pathian leh mipuite zarah Congress in sorkarna a chan hnuah Mizoram Institute of Medical Education & Research (MIMER) tha tak mai din a ni a. Engmah hnathawh awm si lovin Zoram Medical College tiin an thlak a. Kan Pathian hming te hi an thlak duh mai ang tih hlauhawm khawpin hming thlak lamah an tui a hal hi a zia lo hle. Sawifiah ngai lovin MNF nihna hi a lang. SEDP pawh ka lo sawi lawk tawh angin an sem thei mai lo ang. Sem thei pawh ni se inthlan dawn kumah a nelnualin Campaign nan an sem ang, ka tih kha a dikna a lang mek a ni, a ti.
India ram leh kan ram dinhmun tur ngaihtuah thleng phak Politics kan ngaihven a tul. Kan sakhua a him loh chuan kan hnam a him loa, kan ram a him ngai lovang. Congress Sorkar na hmunah Kristian te tunah Zalen takin chanchintha an hril thei. Karnataka State-ah hneh takin Congress a sorkar a. Anti-Conversation Law an thiat a. Hmanni lawka Karnataka hneh taka sorkarna chelhtu Congress chuan Kristian Development Corporation din tumin ruahmanna an siam a, hemi atan hian cheng vaibelche 100.00 a dah hrang tawh hial a ni. Hei hian Congress Party hi sakhaw zalenna kengtu a ni tih a nemnghet chiang a ni, a ti bawk.
Pu Lal Thanhawla chuan, Mizoram mipuite manganna chhawk turin kan ramah remna leh muanna a awm theih nan Congress in lal thutthleng a kian a, tunah kan ramah Kristian te tan ahun thim leh khirh tak kan tawn mekah Sakhaw zalenna kan neih a, Chanchintha thlamuang taka Kohhran te’n kan hril leh theihna turin Congress a Sorkar leh thuai a ngai. Central-ah pawh Congress kaihhruai I.N.D.I.A (Indian National Developmental Inclusive Alliance) a sorkar dawn tih a chiang tawh. I.N.D.I.A hian vote vbch 65 chuang a nei, BJP leh a support tu party in vbch 23 chauh an neih avangin an rorelna namthlukin a awm dawn a ni, a ti.
Pu Lal Thanhawla chuan, Mizoramah pawh Congress Party in hruaitu a nei tha ber. President mithiam leh rintlak Pu Lalsawta kan nei a. Thachhangdawltu tha tak kan neih bawk avangin tun inthlanah pawh kan chak ngei kan beisei. Sorkar tha siam tura kan intih chak tawn avangin vawiinah pawh Mithar za telin Congress an zawm a ni. Mizoramah sorkar tha siama sakhaw zalenna tungding leh turin Mizoramah Congress Party kaihthawhin a awm leh mek. Mizoram mipuite’n eng party nge hmanrua a hman tur leh chawilen tur hriat a ngai, a ti bawk.
