Thu kan dawn danin tunhnaiah NIT Mizoram a thawktu (Non-Teaching) ten an hotute laka lungawilohna an lantir mekah vawiin Dt 20.10.2023(Zirtawpni) leh Dt. 23.10.2023 (Thawhtanni) hian badge dum belin pisa an kal.
He an lungawilohna hi kum 3 kalta atang khan an hotute hnenah thlen thin ni mahse hmalak sak an ni ngai lova, lungawilohna an lantir avanga Dt. 18.10.2023 a pisa an kai loh chhuanlama an service tana pawi tura Leave Without Pay hmanga action lak an tum hi an sutlo a nih chuan an hmalak chhunzawm dan tur ngaihtuah zel an tum ni a thu dawn a ni.
Tun tuma NIT Mizoram Non-Teaching thawktu lungawilote hian tuna an lungawilohna an lantir hmain an harsatna tawh tam tak chu an hotute hnenah vawi tam tak thlen tawh niin tih hlawhtlin hun tur a an intiam sawhsawn sak zel an nih bakah MACP hmu thei ten an hmuh tur pawh pending-luih sak an nih thu an hre ru tih hriat a ni.
Thudawn zel danin NIT Mizoram Director leh a duhsak zual mi tlemte ten Ministry of Education, Govt. of India
atanga NIT Mizoram-in sum a dawn thin pawh dahzai zawka hman aiin an mahni ngaimawh zawng chauha an hman thin avangin tunah hian zirlaite chetvelna tura Bus hire man, Security rawihna, hostel tana tui an leina leh sanitation staff rawihna man pawh pe thei lovin an awm a. Hei vang hian heng service pe mektu te hian an lungawilohna an lantir a hlauhawm hle a, lungawilohna an lantir a nih chuan NIT Mizoram hi ni 1 pawh function theilo tur a ni.
NIT Mizoram Registrar nghet lakna tur advertisement pawh Dt. 19.04.2023 khan chhuah tawh niin tunah hian Director-in a duhsak em em Professor pakhatin charge a la mek a. Registrar post advertised rual hian Technician (EEE) post khat(1) leh Office Attendant post khat(01) advertised a ni a. Heng advertisement hi bawhzui lohin a awm reng a ni.
Tin, Non-Teaching staff promotion thei tawhte chu kum tam tak promotion ngaihsak an ni lova, Faculty thenkhat-te erawh promotion la nei theilo promotion hmu te pawh an awm tawh thu leh Pay Level hnih zuan khum dawrh te pawh an awm ni a thu dawn a ni.
Non-Teaching Officer zingah recruitment in a sawi anga hnathawh tur pek loh leh an room chhuhsaka Dean room atana ruahman sak, room dang ngaihtuahsak loha thutna mumal neilo an awm a. Non-Teaching Officer thenkhat Recruitment Rules in a sawi anga automatic-a promotion hmu tura ngaih-te tun thlenga an promotion ngaihtuah duh loh an nih thu dawn a ni.
Heng bakah hian Advertisement chhuah lovin J.E (Casual) pahnih leh Temporary Faculty pahnih tun hnaiah lak an nih thu dawn a ni.
NIT Statute-in thuneihna a pek piah lamah NIT Mizoram a Dean-ten thuneihna an chelek mek a. NIT Statutes chuan Dean hi Advisory/Functional thuneihna pe in Monitoring hna thawk turin chanvo a pe a. Amaherawhchu tun hnai chho ah heng Dean te hi Office lamah Establishment, Finance, GAD, Civil & Electrical Maintenance hna zawng zawng Administer tur leh hna kal zawng zawng execute tawh tura tih niin hei hi Office Administration a Officer leh staff thawk mekte chuan inhnuaichhiahna leh inrah behna lian takah an ngaih thu dawn a ni.
NIT Mizoram hi Govt. of India in Mizoram state tana a din angin Faculty leh Non-Teaching hna lak a nihin Mizoram mi leh sa tling an awm a nih chuan duhsak thin nise, state dang atanga experience neih nana hna rawn dilte hi chu thuneitu ten 2nd choice ah dah thin se tih an duh thu hriat a ni. Tun dinhmun anga Director leh a duhsak mi tlemte ten NIT Mizoram hi an kaihhruai reng chuan NIT Mizoram hi State dang NIT ah chhunzawm tura ruahmanna awm tawh sa anga an dah a hlauhawm avangin NIT Mizoram a Non-Teaching employee Mizo te chuan NGO’s zawng zawng leh Mizoram mipuite thlawpna leh hmalakpuina an ngen takmeuh a ni.
