Vawiin October 20, 2023 (Zirtawpni) hian Golden Hall, Congress Bhawan-ah Friday Political Session hman a ni a. Pu Lalsawta, President MPCC in thu sawiin; Dr. LH Chhuanawma, Zonuam veng chu Congress Party-a rinawm taka awm turin lawm takin a lawmlut bawk a ni.
He huna thusawitu Pu Lalsawta, President MPCC chuan Kan ram chungchang hi uluk taka han ngaihtuah hian tuna kan boruak anga duhthlanna hman thiam a tul hun hi a awm lovin ka hria a. Hindu, Muslim leh Sakhaw hrang hrang kal duh dan han ngaihtuah hian Kristian chu kan danglam ngam a ngai ta a ni. Chuvangin, MLA General Election 2023 ah pawh hian duhthlanna dik hmanga ram siam hi mipui hian kan thei a ni tih hriain Congress Party thlawp turin ka sawm a che u, a ti a.
Pu Lalsawta chuan Mizoram BJP te hi chu anmahnia ding chhuaka sorkarna siam turin Mizo mipuiin kan ring lo a. An ni hi kan beih ber pawh an ni lo. Central BJP leh RSS in Mizoram luhka (entry point) a hman a tum hi chu Regional Party te an ni a. BJP hian tunah pawh MNF an thawhpui tih kan hre vek a. Mahse, MNF hi mipuiin an hnawl a, an pawm tawh si lo a. Chuvangin, mipui ina an la hnawl loh ZPM hi thawhpui tumin thiam takin hma an rawn la mek zawk a ni, a ti a. Kristian anga kan tanrual a hun takzet a ni, a ti bawk.
He huna lawmluh leh thusawitu Dr. LH Chhuanawma chuan kum 22 lai Congress-ah ka lo awm ve tawh thin a. Mahse, keia karah sawmna ka dawn nasat êm avangin MNF ah ka kal peng a. Mahse, uluk zawka ka ngaihtuah hian Congress lo hi he ram leh hnam dinchhuah lehna atan hian Pathianin min dah sak lo a ni tih ka hmuh chian êm avangin Congress Party-ah ka lo kir leh a. Sakhaw Zalenna duhtu Congress Party hi a him a, mipuite thlamuanna hmun a nih avangin ka lo kir a ni, a ti.
Dr. LH Chhuanawma chuan BJP hian Pu Zoramthanga leh Pu Lalduhoma te hi an Missionary atan an rawn dah a ni mai lo maw tih hi uluk deuhin chhut ve chhin rawh u. MNF in BJP an beih ngam loh dan leh CAB an thlawp dan ngaihtuahte hian a ti chiang hle a. Tin, ZPM lahin beih a hnehin Mizoram BJP kal kan a, Central BJP thawhpui an tum thute kan hria a nih kha! Mizoram hi BJP lakah MNF leh ZPM avangin a him lo mai ang tih a hlauhawm hle a. Chuvangin, mipuiten Sakhaw Zalenna duhtu Congress Party zawm zel turin ka sawm a che u, a ti bawk.
He hun hi Pu Sangzela Tlau, Secretary MPCC in a kaihruai a. Rev. Vanlalzuata’n hunserh hmangin, “Party tina Politician-te hian Zoram mipuite hi min cho ngam em? Ro ka rel chhungin Pathian duh loh zawngin thil tha lo ka ti em? Eirukna sual hi ka haw tak tak em?” tiin zawhna a siam bawk a. Nl. Jenny Zomuansangi’n kalkhawm mipuite zaiin a awi bawk a ni.
