Vawiin (Oct 20. 2023) khan PC Party atanga an chawlhtir leh member atanga an paih tak VL Thazova, PC Gen. Secy. nithin chuan Aizawl Press Club ah chanchinthar lakhawmtute kawmin, PC party atanga an chawlhtir chhan a hnuai a mi ang hian a sawi :-
1. PC Party hriatpuina lo leh thutlukna ni miah lova PC Party President Pu Vanlalruata hming Congress Candidate list siam hmasak te zinga a lo lang ve ringawt mai kha, a duh lo tu leh a dodal nasa ber ka nih avangin, President Pu Ruata ruahmanna ti fail tu a min ngaih avang te
2, PC Party hi Congress in Mizoram Secular Alliance ( MSA) hmanga an boruak vuak hot nàn chauh min duh a, Electoral Aliance siampui atan min duh tak tak lo, chuvangin MSA atang hian PC Party kan inhnuk dawk tur a ni, ti tlattu ka nih avang te,
3.October thla tira President in ruahman sa nei ràn chunga Elected OB te kan inlungrual lo tih denchena chawpchilh taka Party hruaitu election a buatsaiha, kan Senior Vice President leh Vice President a paihthla ringawt mai , ka duh lohzia ka tihlan avang te
4 PC.President in Congress a puih laia West 2 MNF candidate ka puih tlat avangte leh thil dang tam tak a awm.
Hengte avanga Party atanga min ban chhan a nih zawk laiin Department pakhata raltlan tanpuina tur Rs 10000 ( Singkhat) Kumin May thla daih tawha kan GS Organisation changtu nena kan làk ,reilo te chhung thil danga kan lo hman hawh lawk , kan rulh leh vekna pawh May ni 16 a President leh hruaitu thenkhat ten khawchhak lama ràltlante tanpui nana an han hman ngei te chu,pumbilh vekah min sawiin, vawiina remchang lo chunga min hnawhchhuahna tirinawmtu tih ni awm taka hmanruaah an rawn hmang leh hnuhnawhte hi a nuihzat thlak zawk.He thil avanga action an chungah kan lo la tawh an tih pawh hi a tak taka kan chunga action lak a awm lo, hetih chhung hian OB meeting ah kan tel pangngai renga, Press Release ka hmingin kan chhuah reng tho bawk.
Kan Party in Candidate kan neih dawn loh avangin West 2 PC Thalai hruaitute chuan MNF Candidate kan puih tur thu kan puan pawh hi hun danga kan tih dan tho a ni.West 2 ah hian Dawrpui Vengthar leh Kanan Vengin PC Party Unit kan nei renga ,chung thalai hruaituten Press Conference kan neih chu Press mite zawhna kan chhanna ah pawh Hqrs hming ni lovin West 2 PC Thalai adviser ka nihna angin hma ka lak thu pawh ka sawi.Mahse phuahchawp, Party dan kalh tiin mi hnawhchhuahna chhuanlamah an hmang talh tho
Heti khawpa PC Party tana tha leh zung senga Party hmahruaitute zinga mi kan nih reng laia PC Party Original ngaihtheih lohna avanga ka chunga action la duhtu President hian engtikah mah ram ropui a thleng ngai lo vang.
