‘
October 25. 2023 (Nilaini) hian Aizawl North-III huamchhung, Edenthar Vengah Congress Campaign Office hawn leh mithar lawmluhna hun hman a ni a. He hun hi Pu Lal Thanzara, Senior Vice President MPCC in a hman pui a ni.
Pu Lal Thanzara chuan, “Politics kalsual avangin Mizoram a buai a, mi tam takin nasa takin an tuar a. A rapthlak takzet,” tia sawiin, “Tunah BJP avangin kan ramah Kristian te nasa takin kan buai mek a.
BJP hian Kan sakhaw ni serh leh ni pawimawh bawhchhe zawngin Programme an siam zat zat a. Inthlan Vote chhiar pawh Pathianni-ah an ruat leh ngat bawk.
“BJP leh a tawhpui MNF vang hian Kohhran tam takin harsatna an tawk nasa hle a. Pathian ram Chanchintha hrila harsa takzet a. Pathianin a Kohhran hote hmangin kan ram dinhmun min kawhhmuh hi a takin Mizoram mipuiin kan hlenchhuah a ngái a ni.
“Party thenkhatin cheng nuai thum tiamin BJP tanpuina Campaign fund hmangin sorkarna an siam a. Kan sakhua leh kan hnam lungphum an sawinghing a, BJP nena an thawhhona pawh la chhu chat lo MNF party Mizoram mipuiin paihthlak hi tihmakmawh a ni,” a ti.
Pu Lal Thanzara chuan, “ZPM Party pawhin an Leader hovin BJP kal kawng an sial sak a, Central BJP malsawmna dawngin Mizpram siam an tum thu an au pui a. Lunglei lamah pawh BJP chuan Congress kan thawhpui thei lo. MNF leh ZPM erawh kan thawhpui thei an ti hial a ni,” a ti bawk.
“Tunah BJP a siruk lain BJP leh Hindu lalram din tumin hma an la a. Kristian te chuan he inthlan hi Pathian rawn chungin inthlan hmachhawn a tul a. Sakhaw zalenna kalpuitu, Kohhran ten chanchintha thlamuang taka zau zawka kan hril leh theihna turin Congress a sorkar ngei a ngai. Central-ah pawh Congress kaihhruai I.N.D.I.A (Indian National Developmental Inclusive Alliance) a sorkar dawn tih a chiang tawh. I.N.D.I.A hian vote vbch 65 chuang a nei, BJP leh a support tu party in vbch 23 chauh an neih avangin an rorelna namthlukin a awm dawn,” tiin MPCC Senior Vice-President chuan a sawi bawk.
Mizoramah pawh Congress a sorkar ngai ti em em an pung nasa tih sawiin, Lal Thanzara chuan, “Mithar tha tak tak Pathianin kan ram siamtha turin min pe zel a. Kartin mithar lawmluh a let aia nasa zawk zelin kan pung a. Tunkar ni thum chhung chauhah pawh Mizoram pumah mi thar 2700 in Congress an zawm a. Min thawhsaktu Pathian chungah lawmthu kan sawi a ni,” a ti.
Pu Lal Thanzara chuan, “Manipur mipuiin Politics-ah BJP an enchhin a, an enchhin sual nasa hle. Mi tam takin nunna an chan a, a bikin Kristian ten nasa takin an tuar nasa zual. Pathian Biak na tur Biak In pawh nei tawh lo khawpin an rum a ni. Politics hi enchhinna atana hman chi a ni lo tih a chiang hle. Mizoram mipuiin Vote an thlak sual a hlauh avangin Serampore College Principal Dr. Vansanglura pawhin Congress party hmangin sakhaw zalenna siam turin a rawn pen chhuak a ni, a ti.
“Aizawl North-III MLA ni mek chu mi tha tak ni mahse a hruaitu lu ber a fuh loh avangin MLA satliah a nih phah a. Mahni MLA pui te paithlaa hektuah a tan phah a ni. Kawngchhawng te an sawi a. Cheng nuai thum pek che u an tum a, mahse sing hnih leh sangnga chauh an pe che u. Nuai hnih chuang an la batsak zawk che u, bat ral sak che u an pawi ti dawn lo. MNF thutiam engmah rintlak a awm lo,” a ti bawk.
