TBC Lalvenchhunga, Aizawl West I ZPM Official Candidate chuan vawiin khan Aizawl Press Club-ah chanchinthar lakhawmtute kawmin, “Mizoram sawrkar hian sum enkawl a thiam loh em avangin leh sum enkawina kawnga a hlawhchham chian em avangin a pung awma rulh leh turin sum kan puk nasa hle a. Covid harsatna kan tawh lai pawhin Kamrula bill a tang lo a, Abu Mazumdar a buhfai supply to bik pawh bill a tang ngai hek lo. Chutih mipui healthcare bill leh SEDP erawh pe thei lo sawrkar kum 5 kan lo hrawn ta a. Mipui te hian Finance Minister thiamlo ber leh kai peng thiam ber hi vote kan ba lo a ni tih kan puang duh a ni,” a ti.
TBC Lalvenchhunga chuan, “SASCI hi loan a ni a, Central Grant a ni lo tih hi kan hriatchian ka duh a. Covid harsatna vang central sawrkarin state te hnena loan a offer niin state thenkhat chuan leiba kan ngahsa emai tiin an la duh lo nghe nghe a ni. Loan, rulh leh tur a nih avangin income awm leh tura ruahman ni a. Amaherawhchu, keini ramah chuan party mi te induhsakna leh campaign nan te kan hmang mai mai a ni.
“SASCI atang hian kum thum chhungin cheng vaibelchhe 993.1976 rulh leh turin kan puk tawh a. SASCI hi Covid hrileng avanga sum indaih lohna phuhruk nana hmasawnna ruhrel dinna atan, nakin hnua sum thawkchhuak leh thei tur (return of investment) atana central sawrkarin India ram state tinte hnena offer a ni. A duh tana puk theih a, a duh lo tana puk loh theih a ni a. State thenkhat phei chuan an puk duh lo hial a ni. Tin, a la ve te pawhin covid chhuanlam a reh rualin sum puk belh zel tawh lovin, mahni a intuamhlawm an tum laiin, Mizoram sawrkar chuan a theih chhung puk a tum ta a. Kan hriat theih chinah vawiin thlengin cheng vaibelchhe 993,1976 zet a puk tawh a ni.
“Hetih mek lai hian, Mizoramin sum harsatna leh leiba neih tam thute chu, Covid chhuanlama hmang zelin, campaign au hla berah an la hmang zel a. He SASCI sum puk hmang hian hmasawnna ruhrel din lovin, party induhsakna atan mai bakah, CM meuhin bial vil nana an hman thu a sawichhuak hial a. (January 16, 2023 Hnam Run). Hei hi mipui zah lohna nasa taka tling a ni. Budget indaih lohna avanga sum puk tur pangngai piah lam, leiba pawha sawifiah duh lova heti zat an puk dan sawifiah duh si lovin, Mipui hmaah covid vanga kan harsatzia an sawi fo hi chhuanlam tling lo mipui bum tumna a ni.
“Covid hi tunah hian chhuanlam chi a ni tawh lo, 2021-22 thleng kha chuan min la effect in, sawi lang pawh nise thu hran; kum 2023-24 kan kal tawh a khawi state mahin chhuanlam atan an hmang tawh lo. Union Finance Minister Sitharaman meuh pawhin a thu sawinaah a sawi lang ngai tawh lo.
“Mizoram sawrkar hian oovid avanga sum dawn kim loh Vbc. 2636.52 kan nei tiin, chhuanlam siamin sawi lan teh-ah an nei thin a. Kum 2019-20 atanga 2022-23 thlenga kan budget hmuh tur beisei aia tam kan hmuh belh hi Vbc. 2563.17 a ni tih hi mipui ten hria i la. Covid chhuanlama kan sum hmuh loh an sawi ziah Vbc. 2636.52 leh kan dawn belh zat inthlauhna hi Vbc. 73.35 chiah a ni
“Hetih mek laia Covid chhuanlama Vbc1500 vel zet an puk belh mek chung pawha sum indaih lohna nasa tak Mizoramin kan tawk hi sum enkawl thiam loh vang liau liau a ni tih hi Zoram mipui hriatah kan sawi duh a ni,” a ti bawk.
