Mizo National Youth Front Serchhip East Block chuan vawiin khan thuchhuah siamin, “ZPM Leader Pu Lalduhoma’n October ni 21, Inrinnia Serchhip Press Club-a Press Conference-a kohah Serchhip Kawlri tlanga Mizo Cultural Heritage Centre siam tur tun thlenga bul tan a nih theih loh chhanah rem leh rem lova Mizoram sorkar a puh hi pawi kan ti a. Hetianga thudik chanve sawi hi ram hruaitu nih tum chuan sim se kan ti hle a ni. Hetiang hi thil awmdan dik a ni.
“Serchhip Heritage Society in Kawlri Tlanga Mizo Cultural Heritage Centre (MCHC) din tura hma an la hi a lawmawm kan ti a, a hlawhtlin theih nan MZU lam mithiamte nen inremna an siam pawh tha kan ti. Theihtawp chhuaha bawhzui a nih hnuah thawh theih tura beisei anih laiin, harsatna a lo awm ta a. Hei hi a chhan nia lang chu- MZU leh Serchhip Heritage Society te hmalakna zawng zawng hi ama hmalakna leh buaipui anga sawi leh lukhum khum a tum luat avanga thlengah MNYF Serchhip East Block chuan kan ngai a, hetianga mahni thawhrah ni lo seng a tum fo hi sim se kan ti.
“MCHC siamna tur thawh tan a nih loh chhan hi RTI in MZU lamah dil a ni a. An chhannaah chuan “Project Funds hi sanction tawh a ni a, amaherawhchu pawisa dawn a la ni lo. Mizoram University hian ama ram chhungah bak hna a thawh theih loh avangin hma lak chhun zawm a ni lo” tih a ni. Tin, MCHC siamna tura hmalakna Project DPR siam leh bawhzui kawngah hian Political Party bila hmalatu emaw inrawlh an awm em? tia zawh a ni a, chhannaah chuan ‘Awm lo’ tih a ni.
“Press conference-ah hian Pu Lalduhoma’n DPR siam nan Cheng nuai hnih ama sum sengin a pe tih a sawi a. Hei pawh hi thudik tawk lo a ni tih MZU lamin RTI chhanna min pekah chiang takin a lang a. Pu Lalduhoma, ZPM Leader in MZU kaltlangin DPR siam a nei em? A neih chuan engtenge ? tih chu Nei lo tia chhan a ni bawk. Lang leh mai tur thu dik tawk lo hi Mizoram CM nih tum chuan sawi fo lo se a tan a tha zawk ang tih hi kan fuihna a ni.
Pu Lalduhoma hian MZU hi Central University a ni a, State sorkar inrawlh theih lohna an ni tih a hre chiang hle a, chutih laia he project hi a thuanawp leh a hlawhchham theih nana hmala anga Mizoram sorkar a puh tlat hi sim turin MNYF Serchhip East Block chuan kan duh a ni. Thudik chanve hmanga mi rilru hruaikawi hi politics a nilova, dawt a ni tih hre thar turin Serchhip bial mipuite kan ngen a ni,” tiin an tarlang.
