Pradyut Bordoloi, Convener NECCC chuan vawiin khan Aizawl Press Club-ah chanchinthar lakhawmtute kawmin, “BJP hian North East mipuite bumna policy a kalpui mek a. Mipuite min thendarh a, kan chunga rorel an tumin kawngkhar hnung lamah rukru angin rawn luh an tum mek a ni. Chumi tur chuan Regional Party te an hmang mek a ni. Regional Party te hi driver ang maiin an hmang a, an hnungah a rukin passenger angin an chuang a, an duh duhna ah an kalpui thin a ni. MNF pawh hi chutiang atan chuan an hmang mek a ni,” a ti.
Pradyut Bordoloi chuan, “PM Modi hian chuan Manipur buaina kha a ngaihthah lui tlat a, ni 177 lai a ni tawh, mahse Manipur mipuite thlamuan turin tlawh pawh a la tlawh lo a, anmahni tanpui turin pen pawh a la penchhuak lo a ni! An tuarna te, an hliam te tidam turin a ngaihsakna pawh a lantir lo a nih chu mawle! A tih awm chhun chu parliament pawnah second 66 chhung chauh a sawi a. MNF sorkar lai mek hian BJP te inthenhran tumna policy an chhawm nung mek zawk a ni. BJP te hian regional party tin te hi an hmatawngah an ngai a ni.
“North East Congress Co-ordination Committee chuan Mizo te leh zohnahthlakte inpumkhatna hi an ngai pawimawh em em a. Chutiang tur chuan mipiite hian vote thlak se kan duh a ni. Keini chuan Tang Puihna te hi kan thlawp a, kalpui turin theihtawp kan chhuah dawn a ni,” a ti bawk.
Journalist te Zawhna chhang in Assam MP chuan Mizoram Lok Sabha MP chuan Manipur buaina chungchang sawiho tura kan nawr lai khan tawngkam khat pawh a chhakchhuak lova, keini chuan North East mipuite phatsanna nasa tak niin kan ngai a ni.
