“…Congress Party Kan Sorkar Anih Chuan SSA Zirtirtute Harsatna Hi Kan Chingfel Ang A, An Hna Ngai An Thawh Leh Ngei Theihna Atan Hma Kan La Ang…” – Lalsawta, President MPCC
October 27, 2023 (Zirtawpni) hian Congress Party chuan Congress Bhawan, Golden Hall-ah Friday Political Session leh Mi thar lawmluhna hun an hmang a. He hun hi Pu Lalsawta, President MPCC chuan a hmanpui a, mi thar lawmluhna neiin thu a sawi bawk a ni. Pu Lalnuntluanga Pautu, Local Council Member & Ex-VCP, Lawipu, Pu Lalmalsawma, Khatla South leh Pu H. Rodinsanga, Mission Vengthlang te chhungkua a lawmlut bawk a ni.
He huna thusawitu Pu Lalsawta, President MPCC chuan SSA zirtirtu lungawi lote hi High Court-ah sorkar nen an inkhing a. SSA hian chakna an chang chungin, MNF sorkar hian an duh ang a tihhlawhtlin sak thei lo a, a pawi ka ti hle a ni. Congress Party kan sorkar anih chuan SSA zirtirtute harsatna hi kan chingfel ang a, an hna ngai an thawh leh vek theih nan ruahmanna kan siam ang. Vawi leh khatah an zavaia kan thawh tir thei lo anih pawhin a tahtawlin an hna ngai kan chelh tir leh ang tih ka tiam a ni, a ti.
Pu Lalsawta chuan ram chhungah indona a chhuah thusawiin, China leh Pakistan te nena kan indona kha chu a dan a dang daih a. Ram leh ram, ram pawn indona a ni. Ramchhung ngei atanga Rûnna hi India ram leh Mizoram hian kan tawng a. BJP hian Hindutva hi atchilhin, India ram hi Hindu Lalna ram a ni tur a ni tiin UCC tih puitlin an tum a. Parliament Session hnuhnung berah khan Constitution chhut thar kha MP Lok Sabha leh Rajya Sabha te hnenah an sem vak mai a. India dan bua Preamble a Secular leh Socialist tih hi an paih daih mai a. Kristian tan a pawi leh zual em em a ni, a ti.
BJP sorkarin Forest Ammendment Act an passed tak kha Mizoram tan a pawi em em a. Tunah hian kan duh ang anga kan ram kan hman theihna tur a awm tawh lo a. Kan ram hi an duh duhin min chhuh thei tihna a ni. Thlamuang taka awm thei kan ni tawh lo a, BJP ina an fin kherek hmanga Mizo Kristian min dozia hi Mizo mipui te’n ngaihtuah chiang ang u, a ti bawk.
Pu Lalsawta chuan Congress Party hian dawt kan sawi lova, BJP hian kan Kristianna ti dal tura an luhkâ atana Regional Party MNF an hman dante hi chhut chiang i la. ZPM te pawhin sorkarna lo siam palh ta se BJP hmanrua tho tur an nih thu an hotute kâ atang pawhin kan hriat fo tawh hi! Chuvangin, Sakhaw Zalenna duhtu leh BJP thawhpui ve hauh lo tur Congress Party thlawp hi Mizo Kristian kan nihna angin a inhmeh em em a, bial tina Congress Party Candidate lo VOTE theuh turin Mizoram mipui ka sawm a che u, a ti bawk.
He hun hi Pu D.R Zirliana, Secretary MPCC chuan a kaihruai a. Pu David Zochhuanmawia, Media Deptt. MPCC chuan Report pein; Pu R. Lalhmingmawia, GS MPCC in zaihona a kaihruai a. Lawmluhte atangin Pu Rodinsanga leh Pu Lalnuntluanga Pautu te’n thu an sawi bawk a ni.
