“…Bawngkawn Traffic Jam nasa lutuk ti reh turin tuna kan Chief Minister ruahmanna ang ni lo, a tak ram thleng tur ruahmanna kan nei a ni…” – Lalnunmawia Chuaungo, Vice President MPCC.
October 26. 2023 (Ningani) zan khan Aizawl North-I biala Party tin te Candidate tan MPF buatsaihin MPF Common Platform 2023, Bawngkawn south YMA Hall-ah neih a ni.
He hunah hian Pu Lalnunmawia Chuaungo, Vice President MPCC leh Aizawl North-I a Congress Candidate chuan, rinawmna thutiam hi tiam thar zel tur a ni lo. Pathian ringtute leh ram rorelnaa tel tum te chu an rinawm tur a ni. Kun 2018 ah pawh Val Upa Council hmaah rinawmna thutiam a ni a, mahse VUC in MLA Car leina leh MLA hlawhtihpunah pawh engah mah VUC thu an ngai lo, tuna rinawmna thutiam thar ve leh hi Drama mai a ni, a ti.
Pu Lalnunmawia chuan, Congress in Pathian leh mipuite zara sorkarna a chan chuan Cancer leh natna harsa zual bik vei inenkawlna la mekte tanpui nan kum tin budget-ah Rs. 5,00,00,000/- (cheng vaibelchhe nga) a dah ang dawn. Hei hi 2023 MLA General Election Congress Manifesto no 3: para 2(g) ah chiang takin tarlan a ni. Mizoram Budget kan hrechiang a, hei hi kan tithei a, a kawng kan hria a ni, a ti.
Pu Lalnunmawia Chuaungo Congress Candidate chuan, MNF leh ZPM te chuan bial enkawlna kawngah bial mupuite tlawh zeuh zeuh an duh tawk mai chu bial chhung mipuite tan in hawn lohna nia ngaiin, Kei chuan Aizawl North-I bial mipuite tan leh Mizoram mipuite tan englai pawha hmuh leh koh theih ka ni dawn a, an tan ka in hawng reng dawn a ni, a ti.
Pu Lalnunmawia chuan, Bawngkawn Traffic Jam chuan hnathawktu te, Zirlai te leh damlo te’n harsatna an tawh phah nasa hle a, Traffic Jam sutkian dan kawng a awm tih sawiin, Lirthei ke hnih nei leh keli nei chi a te ho kalna tur Flyover harsa lo takin a siam theih tih kan hria a. Tuna kan Chief Minister ruahmanna ang ni lo, a tak ram thleng tur ruahmanna kan nei a ni, a ti a, Bawngkawn by pass road siam dan tur ruahmanna pawh kan nei a, hei hi lirthei kal vel te bakah huanneitute leh kuthnathawktu te tan a tangkai tel hle dawn a ni, a ti.
Pu Lalnunmawia Chuaungo chuan, kan ram leh hnam rohlu kum upa ten Tar chawmna thlatin cheng 300 leh cheng 800 an dawn thin chu Congress Party chuan thlatin cheng 2000 in kan pe dawn, tih sawiin, rualbanlo leh Hmeithai te tan National Social Assistance Programme hnuaia thlatin cheng 400 an dawn chu cheng 2000 in pek an ni tawh dawn a. Chumi atana sum mamawh pawh chhut chhuah lawk vek niin, Mizoram dinhmun en in kan thei tih kan hria, a ti.
Thalai hnathawh tur nei loh vanga ruihtheithil in a tihbuai chu pawi a tih thusawiin, ruihhlo do kawngah dan hnuaia thuneihna neitu zawk sorkar thazawi tihchak a ni anga, NGO leh Kohhran re nena tangkawpin hmalak a nih dawn bakah Congress a Sorkar chuan thalai nuai khat tan eizawnna siam sak an ni ang a, an mahni thiamna leh theihna hmang ngeia eizawngin Mizoram hmel nasa takin an thlak danglam dawn a ni, a ti a. Bawngkawn bazaar chu mi tam zawkin eizawnna an neih theihna tura tihlen a ni anga, thianghlim leh nuam zawkin siam a ni ang, a ti bawk.
He hun hi Rev. R. Lalhmingthanga, Vice President, Aizawl North-I MPF in a kaihruai a. Rev. Lalrinawma, Councellor, FG&CC Bawngkawn in hunserh hmangin Nula Lalhriatrengi leh tlangval TC Hmungte te an zai bakah Pu R. Lalzirliana MNF Candidate, Pu Vanlalhlana ZPM Candidate leh nula Lalruatfeli Hlawndo, Independent Candidate te’n thu an sawi bawk.
