Vawiin October ni 27, 2023 Zirtawpni chawhnu hian Serchhip District MPC Committee huaihawtin Serchhip Bazar tualah Common Platform hun hman a ni.
He hunah hian Serchhip Assembly Constituency a Candidate paruk te an inlan a, MNF Official Candidate Pu J.Malsawmzuala Vanchhawng a che tha fal hle a ni.
J.Malsawmzuala Vanchhawng chuan mi ropui bik a nih loh thu sawiin, Serchhip bial mi ngei a nih avanga Serchhip mipuite tan theihtawp chhuah turin a rawn pen chhuak tih a sawi a. Serchhip bial mipui tana auh leh ban phak nih reng a tum tih sawiin, an khawngaihna dilin a symbol Arsi a vote theuh turin Serchhip bial mipuite a sawm a ni.
Pu Sawma chuan MNF sorkar hmalak tawhna leh a kal mek bakah, a inhuamna te sawi zawh sen a ni dawn lo tih sawi hmasain, “Ka rawn sawilan te hi thinlung ril ber atanga chhuak leh hmalakna tura ka ngaihte a ni” a ti.
Pu J.Sawma chuan Serchhip khawpui thang chho zelah tui thianghlim intur hnianghnar an dawn theih nan Greater Water Supply Scheme siam a tul a ti a, chak taka bawhzui a tum tih a sawi. Tuizem lian sak theihna tur pawh department hotute nen an enho tawh thu a sawi. SGWS hi kalpui ka tum a ni. Tin, Serchhip District Hospital sak thar tur lungphum a ni tawh a, a puitlin theih nan leh Doctor leh thawktu dang indaih lohna phuhruk turin theihtawp chhuah a tum dawn tih a sawi.
MNF Candidate chuan Zirlaiten thiamna leh eizawnna tlak, chhawr tlak an neih theih nan theihtawp chhuaha hmalakpui a tum a. Gov’t Serchhip College ah ‘career guidance and counselling cell’, enterpreneurship knowledge cell an nei tawh a, Vocational training kalpui thar zel pawh NEP ken tel a nih vangin hmalak a tum zel dawn a ni. Govt Serchhip College hian MNF uduhsakna changin Administrative building sakna tur nuai 650 sengin sak mek a ni. Brilliant HSS chu dinhmun tha zawkah hlankai a ni tawh bawk a, a puitlin zel theih nan theihtawp chhuah ka tum a ni a ti.
Govt. Serchhip College ah Commerce zirna awm tura hmalak a tum thu J.Sawma hian a sawi bawk.
“Thalaite tan Mini Sports Complex cheithat a ni anga, fur leh thala volleyball khelh theihna tur te, TT Hall te, futsal ground leh football field neih tawh sa te tihchangtlan zel ka tum a ni.”
“Mat phai, Zawlpui zau hi ngaih pawimawh a ngai zel a. Loneitute tan Link road leh mamawh dang te changtlung zawka chhawp chhuah sak zel ka tum dawn a ni”
“Serchhip Bazar bula PWD Qtrs.awmte vantlang tana hlan tura hmalakna kal mek hi tihpuitlin thuai a nih theih nan chak zawka nawr ka tum ang”
“Ruihhlo bawiha tang mekte chhanchhuah kawngah leh thalaite ruihhlo laka an fihlim theihna tura inzirtirna kawngah kohhran, khawtlang hruaitute leh sorkar nen tangruala theihtawp chhuah ka tum”
“Kawtthler leh kawngsira thil zuarte hamthatna turin hma ka la dawn a. A pung tlemte awma Rs 80000 thleng loan lak theihna PM SVANDHI scheme te, thalai mahni kea din tumten bul an tan theih nan MSME Ministry hnuaiah scheme awmte an chhawr tangkai theih nan hmalakpui ka tum dawn a ni.”
“Pathian leh mipuite zarah MNF in sorkarna kan siam chhunzawm anih chuan SEDP hmanga eizawnna bul tan turte puih chhunzawm zel a ni dawn. Thalaite, mahni kea din tumte tan bik, bul tanna tur Youth Oriented SEDP kalpui a ni tawh dawn a ni”
“MLA fund te dik, langtlang leh tha taka kalpui ka tum dawn a ni. Bialtu MLA ni mek Pu Duhoma thawh tawhte chhunzawm zel turin ka inpe bawk a ni”.
Pu J.Malsawmzuala Vanchhawng chuan MNF hi a dintirh atanga sakhaw tih bik nei, Kristianna chawinung leh chawisang tura din a ni a. Mizoram leh hnam tana pen a inhuam zia chu Myanmar, Bangladesh leh Tripura atanga raltlan lokal kan unaute tuamhlawm kawngah te, Assam nen ramri lama kan buainaah te huai taka pen ngam kan nihna hian a tichiang a ti.
