Vawiin khan ZPM Research Wing chuan an Secretary Dr. KC Malsawmzauva hovin chanchinthar lakhawmtute kawmin, Dr. KC Malsawmzauva chuan, “Research Wing member te hi University leh College a zirtirtute, sumdawngte, entrepreneur-te sorkar hnathawk pension, an thawh laia kawng hrang hranga rualawt em em thin, sorkar kalphungin a zir loh avanga tihlawhtling thei lo, ZPM-a beiseina nei kal khawim te kan ni ber a. Langsar takin politics khel thiam ve lo mah ila ram kan vel vei em em a ni,” a ti.
Dr. KC Malsawmzauva chuan, “Research Wing kan din chhan ber chu zirchianna (research base) hmaanga Zoram mipui kaihhruai leh hmasawnna thlen a ni. State kan nih hnuah kum 36 chhung zet chu party pahnih te rinthu in Mizoram an kaihruai tawh a, manifesto te pawh vote zawn nan an inziah that siak mai mai a ni. Chutiang a party pahanih ten kum tam tak Mizoram an lo kaihhruai tawh avangin kan chhehvel state ten min tlan pel duai duai a nih hi. Chutiang dinhmun atanga Mizoram kaichhuak tur leh ‘Rinthu’ ngawt ni lo, zirchianna (research-base) hmanga Zoram mipuite kaihhruai an nih theih nan tih theih kan nei ve dah lo maw? tiin ZPM kan support ve ta a ni.
“Tuna ZPM policy buatsaihna kawngah pawh a theih chin chin research-based a kalpui a nih theih nan tha kan thawh ve a, kan hun leh tha, thiamnate tlem hle mahse, party dang policy leh manifesto te ai chuan belhchian dawl zawk turah kan ngai a ni. Policy ah hian thenkhat chu tih hlawbtlin nghal mai theih a awm rualin, thenkhat chu hun duh rei tur chite a awm mual bawka, a thena chu sawrkar hnua enzui ngai zel te pawh a awm awm e. Tun tuma Press Meet kan neihna chhan ber pawh Policy leh Manifesto inziah that siak ngawt lovin, research-based policy hi party tin ten neih ni thin se kan duh a. Chumi tihlawhtling hmasa tu nih pawh kan tum a ni. Chuvangin, vawinah hian Mizoram history-a la awm ngai lo research based policy nei awm chhun ZPM party te hi te vote vek turin Mizoram hmun hrang hranga mite kan sawm che u a ni,” a ti bawk.
