8th November, 2023: General Election to the Mizoram Legislative Assembly, 2023 atana vote thlak chu harsatna lian tham awm lovin nizan dar 11:50 khan zawhfel a ni a, vote thlak zo hnuhnung ber chu Marpara South PS, Lunglei District a ni. Zing dar 7:00 atanga tan niin, Mizoram District 11 a Assembly Constituency 40 a Polling Station 1276 ahte boruak muanawm tak hnuaiah vote thlak a ni a. General Election to the Mizoram Legislative Assembly, 2023 ah hian inthlanni Poll Day a vote tla zat chu 80.43% ni a chhinchhiah a ni a, November ni 8, 2023 hian scrutiny of Form 17A neih a ni dawn a, hemi hnu hian vote tlak dan dik tak a hriat theih tawh ang. Hei bakah hian November ni 6, 2023 thlenga chhinchhiah danin Home Voting leh Postal Ballot hmanga vote tla 15,061 a awm bawk.
29-South Tuipui AC huamchhunga Polling Station pahnih, 29/5 Aithur PS (116 voters) leh 29/22 Lungpuitlang PS (106 voters) ah vote nei zawng zawngin vote an thlak kim vek a ni. Assembly Constituency zinga vote tlak thatna ber chu 27-Tuikum AC, Serchhip District niin 87.32% vote a tla a, District zingah Serchhip District-ah vote tla tha berin 84.75% vote a tla a ni.
District hrang hranga vote tlak dan kimchang chu hetiang hi a ni:-
Vote thlak hma Mock Poll neih atanga vote thlak zawh fel thlenga EVM chhia report dawn zat chu BU 49, CU 46 leh VVPAT 139 ni a chhinchhiah a ni a, heng khawl chhiate hi rang taka thlak nghal zel a ni a, vote thlak that (Re Poll) ngai a awm lova, tluang taka vote thlak zawhfel a ni. Vote thlak zawhfel hnu hian Polling party-ten tihfel ngaite an buaipui hnuah District Hqrs-a Receiving Centre an pan leh nghal a, 11:30 PM thleng khan Polling party 1276 zinga 766 ten Receiving Centre an thleng tawh a. Serchhip, Khawzawl leh Hnahthial District-a Polling party-te an thleng kim tawh a ni.
Vote tlak tawhna EVM (Polled EVM) te hi vote thlak zawhah District Hqrs. tina Strong Room siamahte venhimna tha tak hnuaiah vote chhiar a nih hma chu dah that a ni dawn a ni.
ECI chuan nimin tlai khan Press Note ti chhuakin Mizoramah kum bithliah hrang hrangte’n phur leh hlimawm ti takin an aiawh tur thlanga Democracy Kutpui’ an hman thu a tarlang a. Inthlanna muanawm, dik leh felfai neih a nih theih nan ECI in ruahmanna tha tak a kalpui thu a tarlang bawk.
ECI duan inkaihhruainate, Supreme Court thupek leh Dan hrang hrangte tha taka Political parties, Candidates leh mipuite’n an zawm avangin Election Department chuan lawmthu a sawi a. Vote thlak tura mipui zirtir kawnga thahnemngai taka thawktu zawng zawngte chungah lawmthu a sawi bawk a. Inthlanna hlawhtling tak buatsaih a nih theih nana hmalatu Sawrkar hnathawk zawng zawngte leh a bik takin mahni dikna leh mawhphurhna hlentu khua leh tui vote thlak zawng zawngte chungah thinlung takin lawmthu a sawi a ni. Inthlang ram kan nih angin tun mai nilo nakin zel pawha tawiawm zel tura sawmin a ngen nghal bawk a. Mipui rorelna Democracy mawina leh hlutna chawisan zel a nih theih nana theihtawp chhuah zel turin a chah nghal bawk a ni.
