Dt. 09.11.2023 (Ningani) : May Ni 3, 2023 atanga Manipur ram chhunga chi leh chi inkar buaina kal zelah Manipur ram chhunga Zohnahthlak awmte inkara inunauna tha leh zual zawk a awm theih nana Ni 6, September 2023 a Central YMA Hall, Tuikhuahtlanga hnam hrang hrang hruaitu kal kha tena an din, *ZO UNITED* hruaitute chuan vawiin chawhnu lam dar 1:00 khan Central YMA Committee room-ah Mizoram NGO Coordination Committee te an kawm a, hun tha tak an hmang ho a ni.
ZO UNITED hruaitu (executive committee) te hi an Convener, Pu Albert Renthlei in rawn hovin, Co-Convener, Ch Ajang Khongsai leh Zo United Secretary, Rev. Dr. Vanlalnghakthang bakah hruaitu mi 23 lai an tel a ni.
Zo United hruaitute chuan kawng engkima anmahni tanpuia, an hnung dâwmsak tlattu, Mizorama Mizo mipuite chungah lawmthu an sawi a, theihtawpa tanpui zel tur leh an hmelma te laka tangho zel turin Mizo mipuite leh NGO hruaitute an ngen tlat thu an sawi a. Vawiin thleng (9.11.23) a Zohnahthlak khua halsak tawh zat hi khaw 203 niin chenna In hal zat chu In 8166 a ni tawh a. Heng mite tana awm alilawkna tur (Relief camp) 200 siam a ni tawh a. Chenna In nei lova awm tawh chin (displaced people) chu mi 50,000 (Sing nga) chuang an ni tawh a, buaina avanga nunna chan hi mi 151 an tling tawh a, tin relief camp-a awm mi 42 laiin nunna an chan tawh bawk, niin Zo United hruaitute hian report an pe a ni.
Vawiina Zo United hruaitute lo dawng sawngtu Mizoram NGO Coordination Committee hruaitute hi an Chairman, Pu Lalhmachhuana President, Central YMA in a kaihruaia, NGO hrang shrang hruaituten thu a sawi a ni.
NGO CC Chairman, Pu Lalhmachhuana chuan kan Zohnahthlak unau te tawrhna hi a tawp mai dawn lova a lan avangin kawng engkimah kan fei a ngai a, tei rei peiha pawl kaihruai turin Zo United hruaitute a lo fuih a, Mizoram mipuiten kan theih tawpin kawng engkimah kan in tanpui tawn zel ang tiin a lo thlamuan bawk a ni.
Zo United hruaitute hian nimin, Ni 8.11.2023 (Nilaini) khan SoO group leh Zohnahthlak MLA awm zawng zawng te nen inhmuhkhawm (Meeting) an lo nei tawh a ni.
