Aizawl, April 4 : I&PR Minister Pu Lalruatkima chuan vawiin khan MJA hruaitu tharte chu a office ah lengah sawmin thingpui a inpui a. Ram rawngbawlna atana tan lak tlanna tur te inpawh takin an sawiho a ni.
Minister chuan MJA ten sawrkar hmalakna hrang hrangte puangzara a bik takin Covid hripui dona kawnga sawrkar an tawiawmna ah I&PR Department changtu Minister a nih angin lawmthu a sawi a. MJA te hamthatna atana Mizoram sawrkarin a theih anga anga kawng a dap sak dan te tarlangin Press Enclave leh thil thenkhatah erawh chuan beisei anga hlawhtlinna a la awm theilo erawh chu pawi a tih thu a sawi a. I&PR Department leh a department enkawl dang, Rural Development leh Land Revenue & Settlement te nena Mizoram tana hna an thawhna ah a tul ang zela thurawn pe a, amah finchhuah thin turin MJA te chu a chah a. MJA hruaitu thlan thar te chu duhsakna a hlan a ni.
MJA President Pu C.Lalrambuatsaiha chuan I&PR Minister-in MJA hruaitu thlan tharte ngai pawimawh a, an puala thingpui inho leh inkawmna hun remchang a siam chu lawmawm a tih thu a sawi a. I&PR Department leh MJA te inkara thawh hona tha tak chhunzawm a, Mizoram sawrkar tawiawm turin MJA chuan theihtawp an chhuah zel dawn a ni, tih a sawi bawk. MJA President chawl ta Pu Zonunsanga Khiangte leh member dangte pawhin thu sawiin Press miten sawrkar an beiseina leh an harsatna neih te Minister hnenah hian an thlen a ni.
