Vawiin April ni 4, 2022 (Thawhṭanni) hian Environment, Forest & Climate Change Minister, Pu TJ Lalnuntluanga chuan Tuirial biala Kawnpui Branch YMA Park leh ram humhalhte a tlawh a. Khawtlang hruaitute leh YMA hruaituten an lo dawngsawng.
Kawnpui ‘Zo ngaw’ 750 Hactare-a zau leh Forest Department-in Medicinal Plant siamna atana an lo ruahman tawhnate a tlawh bawk a. Forest Minister hian ramngaw humhalhna leh mihringten boruak thianghlim kan dawn theihna tur atan te, Eco-friendly tea kalpui leh enkawlzui a nih zel theih nan Central Scheme pakhat ‘Nagar Van’ aṭangin cheng vaibelchhe hnih (2 crore) hman phalna min pe a. Chumi atan chuan rawtna (Proposal) a rang lama lo siam turin YMA hruaitute a chah a. An hmalak tum dan chu Forest Minister Pu Manuna chuan Tuirial Bial MLA Bye Election neih dawna MNF-in an lo intiam tawhnate bawhzuina pakhat a nih thu a sawi.
Hemi hnu hian Kolasib Vengthar Village Council Area huamchhunga ‘Khâm Ropui’ hmun pawh a tlawh a. Minister Pu TJ. Lalnuntluanga chuan Central-ah nasa taka an beih avangin ‘Nagar Van’ scheme chu Muninicipal Area-ah chauh hman theih tura tih a nih laiin, tunah chuan Mizoram chhunga Town/Notified Area-ah hman min phalsak ta a. He Project atan hian vaibelchhe hnih zel notified town atan min phalsak a. Ruahmanna in neihte a rang lamin Department-ah thehlut turin amah lo dawngsawngtu Kolasib khawtlang hruaitute chu a chah a. Kolasib DFO Office-te’n ramsa rêp an man khawm sa, Sakhi sa, Sahuai, Sava rêpte chu DFO tualzawlah Pu TJ. Lalnuntluanga hian a halral nghal bawk.
Hemi hnu hian Bilkhawthlir Joint YMA Park a tlawh a. He park-ah hian khawthlirna ‘watch tower’ leh ṭhuthahchawlhna (waiting shed) engemawzat siam te, sava tlan thing phun leh pangpar tam zawk khawi leh thil dangte hmanga tichangtlung tura an lo dilna chu, Minister hian lo enzui a tum thu a sawi.
EF&CC Minister, Pu TJ. Lalnuntluanga hian Serlui B’ Hydel Project tuikhuah pawh a tlawh a. He tuikhuah vaukam tawn tawna thing leh mau chereu mek chu tui tlem chhan pakhat a nih thu leh, a catchment area treatment plan engtin nge kan siam ang, thing phun belh hmanga humhalh te, vaukam lama lei tawlh ṭhinin tuikhuah a hnawh dan te, lei tawlh tur ṭham khawmtu thing leh mau chereu vanga harsatna awm theite Lawngah chuangin a en kual a. Kan reserve area-te humhalh hi MNF sorkar chuan a ngai pawimawh takzet a. Nakin zelah kan tu leh fate tana chhenfakawm tur hnutchhiah kan tum tlat a ni, a ti.
