December ni 15, 2023 hian Congress party chuan Congress Bhavan kharna hun an hmang a, he hunah hian Pu C Ngunlianchunga, Lawngtlai W Bialtu MLA lawmpuina hun hman a ni bawk. He hunah hian Pu Lalsawta, President MPCC chuan thu sawiin, “Ram leh hnam tana thawktu Pu C Ngunlianchunga kan nei hi Congress kan vannei em em a. A ni hi awmhmun atanga Ram leh hnam tana rawngbawl thin a ni a, Driver atanga bul tanin MLA thlengin a ni chho thei a ni.
Inthlan kalta khan beiseina sang tak kan nei ve a. Mahse kan beisei ang kan ni pha ta lo a. Mipuite’n ZPM ‘Enchhin’ an duh a, an enchhin hma chu an rilru a dam dawnlo a ni. Thinlung takin ka lawmpui a, sawrkar tha an siam chuan kan sawrkar nen a inang reng a ni. An tan i tawngtai theuh ang u.
“Amaherawh chu Congress hi beidawng a thu mai mai thiang kan ni lo. Kan tlakna sang mah se, kan bei zel dawn a, kan tho leh dawn a ni. Miin min duh rihlo mahse, mi duh turin kan insiamtha anga, kan hmaah hian beiseina eng a awm a, chu chu kan zui zel dawn a ni.
“Krismas lawmawm tak hmang tur leh kumthar hlim taka hmang turin in zavai in duhsakna ka hlan che u a, chibai ka buk a che u” a ti
He hunah hian Pu C Ngunlianchunga pawhin a Politic zinkawng leh a hlawhtlinna te ngaihnawm takin a sawi a, “Politic ah hian seat vawikhat mah ka la dil ngai lova, ka din tawh chuan tumah in min chuhpui ngai lo bawk. MDC ka nih dawn pawhin ka khawlai leng mi sawm a ni” a ti a, Village Council Member anih atanga MLA ni a Minister hial anih chhoh dan a sawi a. “Ka bialah sawn MDC bial 11 a awm a, Tuntum inthlannah hian MDC pakhat pawh pawh kan nei lo a, mahse Pathian’in min hruai a, hnehna min chantir hi ka lawm em em a ni. Hei chen hi min hruai a, tling lo mah ila kan lawm em em tawh laiin min tlin tir leh hi kei leh ka chhungte hi Pathian hian a takin min hruai ani tih kan hria a, min hriatpui ve ula ka duh a ni.
“Politic ah hian tu pawh kan khingpui an ni ang. Kan khingpuin te nen mimal inhuatna hi neih loh tur a ni. kei pawhin ka khingpui lo ni tawhte nen mimal inhuatna kan nei ngailo a, tunhnu ah min puitu te an lo ni zawk a ni.” a ti.
He hun hi Pu Lalnunmawia Chuaungo, Vice President MPCC chuan a kaihruai a. Mahila leh NSUI te pawhin Pu C Ngunlianchunga hi lawmpuina thuziak an hlan bawk a ni.
