Dr. Lalmalsawma Nghaka, President, Mizoram Volleyball Association chuan KODVA (Kolasib District Volleyball Association) League Phase One Final a hmanpuiin, “Volleyball khel thinte, an thiamna hmanga eizawnna nghet an neih theih nan theihtawpin hma kan la zel dawn” a ti.
Vawiin ni 3.2.2024 (Zirtawpni) khan KODVA (Kolasib District Volleyball Association) League Phase One, January ni 29.2024 atanga khelh chu a kharna hun Kolasib YMA Volleyball Court ah kharna neih a ni a. He hun hi Dr. Lalmalsawma Nghaka, President, Mizoram Volleyball Association in a hman pui.
Dr. Lalmalsawma chuan, Infiamna hmanga mi tam takin eizawnna hlawhtling takin a neih theih a, chu chu tihtakzeta beia insum thei te chungah a thleng thin, tih sawiin, Kolasib District Volleyball Association hmalakna hnuaiah Kolasib District atangin Volleyball player hlawhtling tam zawk an lo chhuah ngei a beisei a, chutiang tur chuan Kolasib District Thalai ten theihna an nei, a ti a, infiammite tana hruaitute thawhrimna leh inpekna chu ramin a rah kan hmu zel ang, a ti bawk.
MVA President Dr. Malsawma chuan tournament tanpuinan tangka fai a pek bakah Kolasib District Volleyball Association in Semi-Indoor Volleyball Court, College Veng-a LAD Department hmalakna hnuaia sak mek metre 26 a sei, metre 17 a zau, cheng nuai 28 seng a sak mek chu a hmunah tlawhin a en nghal a. Sorkar kal taa Kolasib bialtu Pu K. Lalrinliana hmalaknaa Volleyball stadium tha tak buatsaih a ni chu lawmawm a tih thu leh changtlung zawka buatsaih leh hman theiha zawh thuai a nghah-hlelhawm tawh thu a sawi bawk.
He hun hi F. Lalmuanpuia, General Secretary, KODVA in a kaihruai a, Clement Lalhriatpuia, Chairman, KODVA in report a pek bakah R. Lalrinngheta Vice President in kawmthusawina hun a hmang bawk.
