Ngopa, April 7 : Nilai zan khan ZPM Leader Pu Lalduhoma chuan Ngopa Zawlbukah public meeting a nei.
Pu Duha chuan, “Tunah hian nasa takin ZPM-in beihna kan tawk a, kei phei chu a mimal ang pawhin min bei nasa em em a ni,” a ti a. “ZPM hi a lo din khan pawl paruk inchhungkhawm kan ni a, miten an inlungrual thei lovang, ‘symbol-ah an buai ang’, ‘flag-ah an buai ang, ‘party hmingah an buai ang’, ‘president-ah an buai ang, ‘Chief Minister-ah an buai ang’, min ti a, pakhatah mah kan buai lo a, kan party anga inlungrual leh ṭangrual an awm lo a ni,” a ti.
Pu Duha chuan kan sawrkar hrawn mekah contract pek chungchangah uchuak taka induhsakna a hluar hle thu sawiin, “Restricted tender mai ni lovin, work order pawh awm miah lova hnathawhte pawh a awm a ni. Hei hian a nghawng chu hnathawh ṭhat loh leh a huna zawh loh a ni a. Revised estimate siamin sawrkar sumin nasa takin a tuar a, a tuartu ber chu mipuite kan ni,” a ti a. “ZPM kan sawrkar hunah chuan contract hi a hun lova zawh tih hi a awm dawn lo a. Hnathawk tha lo leh a huna zo lo chu kan hrem nghal zel dawn a ni. Hmasawnna hnathawhte endik turin ‘Monitoring Council’ kan din ang a, anni hian hna reng reng a that leh that loh an en anga, hmalak zel dan tur pawh anni kutah hian a awm dawn a ni,” a ti.
Sawrkar awm tawhah kuthnathawktute an beidawn thu sawiin, “Kan sawrkar hrawn mek leh hrawn tawh ten kuthnathawktute tan ruahmanna nei ve thin bawk mah se, a project a mumal loh avang leh a market lam an ngaihsak leh si loh avangin mipuite min ti beidawng fova, a thawk tam leh a thar chhuak tam apiang ten dah ṭawih tur kan ngah ting mai a ni. ZPM chuan kuthnathawktute hi kan ngai pawimawh ber a, kuthnathawktuten lei rem kan rah ve phawt dan tur kan ngaihtuah dawn a. Chumi tur chuan Sawhthing pawh Kg-ah ₹ 50 in kan lei dawn a ni. Chutianga lei rem kan rah hnuah a tah tawl tetein eizawnna ngelnghet zawk kan siam chho zel dawn a ni. Chuvangin Sawhthing te pawh tun aṭangin a chi tur in lo ngaihtuah lawk a ngai dawn a ni,” a ti bawk.
He hunah hian Consultant Pu F. Rodingliana pawhin thu sawiin, “Lengteng Constituency huam chhûngah ZPM-in hmasawnna hmel duhawm tak kan hmu zel a, kan unit hruaitute pawh khawtlang leh Kohhrana mi ṭangkai tak tak an lo ni leh zel mai hian min ti phur em em a ni,” a ti a. “Kan ram siam ṭha turin mipuite kan ṭhangharh mek a, ram leh hnam tungding turin kan ṭan deuh deuh a ngai a ni,” a ti bawk.
Pu Lalduhoma hian ZPM zawm thar mi duhawm tak tak 418 a lawm lut nghal bawk a ni.
