Vawiina Budget Session neih chhunzawmah Opposition Leader Lalchhandama Ralte-in zawhna a siam, “Social Welfare Minister in dt.14.12.2023 Assembly House a hriattir/puan ang khan mitthi ruang phurh hi sorkar in engtik hun atangin nge mawhah a lak dawn?” tih chu Social Welfare Minister Lalrinpuii chuan, “Sorkarin tunah hian ruang phurh inkaihhruaina dan a duang mek a, ngaihtuahna tam tak sen ngai thil a nih avangin he thil hi Cabinet meeting-ah Agenda atan chhawpchhuah tum a ni,” a ti.
Lalchhandama Ralte, MLA zawhna tho, “Budget-ah ruang phurhna hi dah luh (reflect) tan a ni em?” tih pawh chhangin Social Welfare Minister chuan, “Ruang phurh hi hmalak dan tur leh inkaihhruai dan tur te hi buaipui mek niin Department chuan Budget proposal-ah Revised Estimate 2023-2024 ah Rs. 1.00 crore leh Budget Estimate 2024-2025 ah Rs. 5.00 crore a dilna thu thehluh mek a ni,” a ti bawk.
