Vawiina Assembly Budget Session neih chhunzawmah opposition member Dr.K.Beichhua zawhna chu Healt Minister Lalrinpuii chuan chhangin, “Tun dinhmunah hian Mizoramah Health & Wellness Centre (HWC) 391 kan nei a, chungte chu :- Primary Health Centre (PHC) HWC -54 ; Sub-Centre (SC) : HWC – 319 ; Urban PHC : HWC – 9 ; Urban HWC – 9 te an ni a. Health & Wellness Centres (HWCs)-ah hian thawktu awm tur ang dah khah vek a la ni lo,” a ti.
Health Minister chuan K.Laldawngliana, MLA zawhna pawh chhangin SEDP sum vaibelchhe 150 atanga Health Care Bill tur vaibelchhe 40 dah hran chu semchhuah a la ni lo a ti bawk.
Opposition Leader Lalchhandama Ralte zawhna pawh chhangin Health Minister chuan, “Sorkar hmasa in PHC thenkhat CHC (Community Health Centre) a a upgrade tak te hi tipuitling turin hmalak mek a ni,” a ti a. “Mizoram chhunga Remote Area thenkhat ten Medical facilities tha an dawn ve theihna tur atan sorkar hmasa in SEDP Clinic Centre 245 a siam te kha chhunzawm tumna a awm em?” tia a zawhna chu, SEDP a awm tawh loh avangin chhunzawm a ni lo niin a chhang bawk.
Lalrinpuii, Health Minister chuan Ramthanmawia zawhna, “Mizoram Health Care atana cheng Vaibelchhe 40 dah atang khan damlo engzat hnenah nge Bill pek chhuah a nih tak? Sum engzat nge pek chhuah a nih tak?” tih chu chhangin, “Mizoram Health Care atana cheng Vaibelchhe 40 dah atang khan damlo hnenah bill pek chhuah a la ni lo,” a ti.
Lalrintluanga Sailo zawhna pawh chhangin, “Sorkar hmasain Health Care atana Asian Development Bank (ADB) atanga loan cheng vaibelchhe sangkhat (1000) lakna tur a tih fel tep kha nikum State MLA inthlan kan hmachhawn khan tlemin a ti khaihlak a, hmalak mek a nih laiin Asian Development Bank lampang in kumin India ram pum inthlan kan neih zawh hnu June thla a loan sign turin an hmachhawp e,” a ti bawk.
