Vawiin February ni 23, 2024 (Zirtawpni) hian Mizo Hnam Run chhung inkhawm neih a ni a. Hun hnihna political session-ah MNF Gen.Hqrs. Adviser, R.Lalzirliana, Ex-Minister chuan tun inthlanah khan zawlnei leh thlarau mi intite thupuan a dikloh nasat thu sawiin, Pathian chu tawngkam mai ni lo, thinlung zawng zawnga tih mi a ni, a ti. MNF insiam that leh thuai theihna tur chuan thawktu zawng zawngte kan chaklohna lai inenfiah a ngaih thu leh, kawng engkimah Pathian rawn chung zela kal a pawimawh thu te, ‘Pathian leh kan ram tan’ titu party chuan thinlung leh tih takzeta Pathian lam kan hawi reng a tul thu a sawi bawk.
R.Lalzirliana chuan tun dinhmunah chuan politics a ni emaw, kohhran huang chhungah pawh thalaite mize mila kal thiam a piang an dingchang tawh a, kan rilru leh ngaihtuahna zawng zawngte chu thalaite rilru mila kan inherrem thiam a pawimawh tawh a ni, a ti a. Tun inthlana ZPM tlin chhan kha ZPM te that bik leh tam bik hrim hrim vang pawh ni lovin, rulling chet chhiatna lai an hmuh leh hriatte kha an kher peih em em a, an vawrh nasa a, kha khan mi rilruah nasa takin hna a thawk a ni, a ti bawk.
