Vawiin 23 February, 2024 a Congress Party chuan Congress Bhavan-ah ‘Friday Political Session’ an hmang a. He hunah hian MPCC OB thlan thar te charge inhlanna hun hman a ni a. EM thlan thar te certificate hlanna hun hman a ni bawk.
MPCC President Lal Thanzara chuan, “Party inthlanna felfai tak kan neih theih avangin Pathian hnenah lawmthu ka sawi a. Inthlanna engkim felfai taka siamtu GAD te hnenah lawmthu ka sawi a. Election Department hnenah lawmthu ka sawi bawk a. Inthlan min buaipui sak tu te hnenah RO leh PO te felfai taka inthlan min neihpui avangin lawmthu ka sawi a ni,” a ti a. “Zoram dung leh vang chhim chhak thlang atanga inthlanna neih tura lokal palai te hnenah lawmthu ka sawi a ni,” a ti bawk.
Lal Thanzara chuan, “MPCC OB ni tura Pu Lalnunmawia Chuaungo leh Dr. Lalmalsawma Nghaka te nena min vote tute chungah lawmthu ka sawi a.
Camapaign laia tawngkam duhthawh deuh midang tana hriat nuam lo kan tih a awm chuan min theihnghilhsak turin ka nge che u a ni.
“Congress party kan kal zelnaah min finchhuaha, thurawn min pe a, min tawngtaipui reng turin ka ngen che u a. Hmalam pana kan dinchhuah leh theih nan kan chunga mawhphurhna min pek hi tihhlawhtlinpui ngei turin hma kan la dawn a ni.
“Kan OB tling lo te pawh kan hruaitute in la ni reng dawn a, min tanpuina kan ngen a, khawharin in awm lovang tih ka tiam che u a. Executive a tling lo te, in zavaiin party a hmalakna min thawhpui zel turin ka ngen che u a ni. Kan senior Pu Lal Thanhawla, CWC member leh Pu C. Chawngkunga ten min la uap zel hi thla muan thlak ka ti a ni.
“MLA inthlanah kan hlawhtlinpui loh che u avangin in mi ngaihdamna ka dil a ni. India ramah nekchepna leh tihduhna a nasa zelah kan ram leh hnam, kan sakhua chawikana humhim a nih theih nan Mizo mipui te ka sawm che u a. MP inthlan lo awm turah Mizoram leh India ah INC in hlawhtlinna a chan ngei theih nan thawkho ang u. Hun thar kan kai a, tumah in eilo awm lo va, tangruala ke pen zel turin ka sawm che u a ni.
Vice President Lalnunmawia Chuaungo chuan, “Min vote tu te chungah lawmthu ka sawi a, min vote lo tute chungah pawh lawm thu ka sawi a ni. Min duh lo tihna a ni lo va, kei aia duh an nei zawk tihna mai a ni a, min duh lo tihna a ni reng reng lo.
“Kan party hi a bulthut a dik a. India zalenna min sual chhuahsak tu chu Congress a ni a, India Constitution-a ruahmanna Special Protection leh Reservation min siamsaktu chu Congress hi a ni a, he mi zarah hian hnam upa zawk te kan el ve thei a ni. Congress hi hnam hnufualte tana thawktu leh thlavang hauhtu leh chhawmdawltu an ni.
“Kan president thlan Pu Lalthanzara hi Cabinet minister kum sawm chuang a ni chungin a thiltih that te tlangaupui chi a ni lo. Miharsa leh chanhai te tan pa nih a tling a. Kan ram kaihruai tura mi tling a ni. A kaihza kan veng ang, theihtawp kan chhuah ang, a hovin ram rorelna sorkar pawh kan din ngei kan beisei a ni.
MPCC Treasurer Dr. Lalmalsawma Nghaka pawhin thu sawiin, “Congress party tho chhuak leh turin pheikhai rualin pen chhuak leh ang u. Zokhaw lam kan party hruaitute pawh tunah chuan kan thu leh hla ringawt ngaichang lovin, in thu leh hla headquarter hian kan ngaihthla thung dawn a ni.
“Tunah chuan innghaithla tawnin, kan unit leh veng chhunga party mi leh sa te thu leh hla pawh ngaithla thiam ila, India ram thil thleng kan hria a, state khatah chuan UCC an hmang der tawh. Kan hma hunah hnathawh tur kan ngah lutuk. India ram puma sakhaw zalenna a awm theih nan te, keini anga hnam tlem zawk te, hmun hla zawka awm te dikna chanvo humhim turin theihna kan nei a, chu mi tur chuan i pen thar leh ang u,” a ti.
President kal chhuak Lalsawta pawhin thu sawiin, Congress Party ah hruaitu tha tak tak kan nei ta. Keini chu hnah hlui ni tawh mah ila, That loh theih lohna bawm hi rawn ngai pawimawh hram rawh u, tiin sorkar tha nei tura that loh theih lohna pawimawhna a sawi a. MP atana Congress Candidate lo thlang tling turin ka ngen bawk che u a ni a ti.
He hunah hian OB thar te hi Mahila, MPYCC leh NSUI ten lawmpuina pangpar leh thuziak an hlan a ni.
