Finance changtu Chief Minister Lalduhoma chuan vawiin khan Assembly budget session-ah kum 2024-25 Mizoram budget Rs. vbc. 14,412.12 (2023-24 budget 14,209.95) a pharh a. Hemi hnu hian Assembly Conference hall ah chanchinthar lakhawmtute kawmin, budget sawifiahna hun a hmang bawk.
Budget pumpui Rs. vbc. 14,412.12 zinga Rs. vbc.11,957.04 chu sawrkar hnathawk hlawh, sawrkar inrelbawlna, pension hlawh (revenue expenditure) a ni a, Rs. vbc. 2,455.08 (17.03%) chu hmasawnna hna thawhna tur (capital expenditure) a ni.
Sawrkar kum kal mek 2023-24 atana Mizoram budget chu Rs. vbc. 14,209.95 niin, 2024-25 atana a punna Rs. vbc. 202 vel a tling a ni.
Thil pawimawh dang te
1. FRBM Statement pathum(3), a hrang theuha pharh thin chu kum 2024-25 -ah chuan Central lam tih danin bu khatah dah a ni a, Table of Content siamin tarlan a ni.
2. Kum 2024-25 Employment Salary Data chu a soft copy a pharh leh a ni. 3. Gender Budget a vawi khat nan Budget 2024-25 -ah pharh tel a ni.
4. Kum 2024-25 chhunga sum hmuh tura beisei zawng zawng chu Rs. 14412.12 crore a ni, kum kal mek 2023-24 ruahmanna Rs 14209.95 crore aiin 1.42%-in a pung hret a ni. Heti hian Expenditure lam pawh sum hmuh tura beisei chhungah hian khung niin, Rs 14412.12 crore hi kan gross expenditure tura ruahman a ni.
5. Fifteenth Finance Commission in a ruahman anga sum hmuh beisei zat chu hetiang hi a ni: (i) Share of taxes : Rs. 6098.93 crore. (ii) Post Devolution Revenue Deficit Grant : Rs 1079.00 crore (iii) Urban Local Body Grant : Rs 39.00 crore (iv) Rural Local Body Grant : Rs 76.00 crore (v) State Disaster Risk Management Fund (SDMRF): Rs 54.00 crore (vi) Health Grants : Rs 34.51 crore
6. Kum thar 2024-25 chhunga Sawrkar sum pOk tur zat ruahman chin chu Rs 1992.03 crore a ni a.
Heta tang hian Scheme for Financial Assistance to States for Capital Investment (SASCI) hnuaia kum sawmnga hnua rulh tul interest-free loan Rs 500.00 crore, Market Borrowing ah Rs 1170.00 crore leh NABARD hnuaiah rural infrastructure tihchangtlun a nih zel theih nan Rs 250.00 crore te hi a lian zual te an ni. Tin, urban infrastructure, NABARD scheme-ina a huam tel ye si loh te tihchangtlunna atan Urban Infrastructure Development Fund atang 25.00 crore leh SIDBI hnuaia Cluster Development Fund atang 130.00 crore beisei a ni tel bawk a ni.
7. Sawrkar laipui scheme CSS sum lo do letna tur te, EAP scheme-a state sum turn ye tur lo dah zel theihna turin counterpart funding atan Rs 250 crore dah a ni.
8. Sawrkar flagship programme, “Bana Kaih” (Hand Holding) policy hmanga ram chhunga kuthnathawktute tihhmasawnna turin Rs 200.00 crore ruahman a ni a. He policy kaihhnawh department-te chu an scheme leh proposal-te azirin Sawrkarin a tul angin sum a pe dawn a ni.
9. Thingtlang lam mi khawsak harsa zualte khawipuia an boralin, an ruang phurh hawna atan Rs 5.00 crore ruahman a ni a, Social Welfare Department kaihhruaina hnuaiah buaipui a ni ang.
10. Healthcare lama indaih loh phuhruk nan kum 2024-25 atan Rs 20 crore dah a ni.
11. Power generation (siamchhuah lam) leh power supply mumal zawka kalpui a nih theih nan Rs 20.13 crore dah a ni bawk.
12. Inkalpawhna kawngpui leh leidawh thawm that ngaite thawm that nan kum 2024-25 chhunga hman turin Rs 100.00 crore dah a ni.
13. Budget Speech leh documents dangte hi Finance Department website https://finance.mizoram.gov.in atanga download theih a ni.
