Vawiin 27.2.2024 (Thawhlehni) hian Mizoram Pradesh Youth Congress Committee President Pu Laltawnliana leh Senior Vice President Pu Ngurdingpuia te chuan Vairengte leh a chhehvel khuaa Hmunphiah chingtute harsatna enin a hmunah an kal.
MPYCC hruaitute chuan Hmunphiah chinna hmun Aitlang tlawhin helai hmuna hmunphiah chingtute harsatna chuan kum tam tak nghawng a nei zui tur chu pawi an tih thu an sawi a. Pu Laltawnliana, President, MPYCC chuan, Mizoram chhunga Hmunphiah chinga eizawnna tha leh hlawk tak nei mi tam zawk chu NLUP atanga bultan an ni tih sawiin, kum 2016 daih tawhah khan Vairengte ah Hmunphiah hring 1st Class Kg.1 Rs. 35/-, Saiphai ah Kg.1 Rs. 40/- te a hralh a lo ni daih tawh. Hemi kum pawh hian state pawnah Hmunphiah cheng 42,69,470 man zet hralh chhuah a ni, tih sawiin, Kum tin a man a sang chho zel laia kumin 2024-a Sorkarin Hmunphiah man nasa taka a ti chhe ta mai chu in rawkna nasa tak a ni. Hmunphiah man to lai leh hlawk lai ber hun Febuary thla an hlawk hun lai bera a hralhna chungchanga an buai a, che thei loa an awm chu pawi a tih thu sawiin, ZPM sorkar chu Kuthnathawktute khaichhuaktu ni lovin Kuthnathawktute tana mangchhia an ni. kuthnathawktute Hmunphiah hralhna awm loh avanga an tawrhna hian a nghawng a thui hle dawn a ni, a ti.
Pu Laltawnliana chuan, RR Associates-te inremna a siampui avangin kum danga Hmunphiah latu dang te inrawlh a rem tawh loa, Sorkarin Hmunphiah hralhna rate a siam leh si avangin RR Associates-te chuan chhuanlam siamin an inthiarfihlim san leh si avangin harsatna tam tak a thleng tih a sawi a. Tunah hian loh theih lohna vangin Hmunphiah chingtute chuan loh theih lohin kg khatah cheng 13-15 in Hmunphiah an sah tir a, a hun taka Hmunphiah leh a tul si avangin pawisa nei lo chungin Hmunphiah hralh hun atana pek turin hlawhfa nen Hmunphiah an sat a. Engmah hlawkna an nei lo, an tawrhna hi a zual dawn chauh a ni, a ti.
Pu Laltawnliana chuan, Hetianga Hmunphiah chingtu Kuthnathawktute nasa taka an buai lai hian Mizoram Chief Minister berin, he thilah hian sorkarin thiam loh a nei lo, Agent te thiam loh a ni, kan tuar tlang a ni ber, a ti chu mawhphurhna la ngam lo Chief Minister a nih zia chiang takin a lantir a ni, tih sawiin, Hmunphiah chingtute hian a hralh theih loh chhan ni lovin, an hralh theih dan tur, a solution hi a ni an hriat duha an mamawh. “Kan tuar tlang” tih hi tuna Chief Minister Minister leh MLA te, inthlan dawna in affidavit thehluhah pawh hausa tak takte leh Hmunphiah chingtute mi harsa te tawrhna hi huang khata dah chi a ni lo, inpalzutna a ni, a tih sawiin, Hmanni lawkah Chief Minister Pu Lalduhoma’n Press Confenrence-ah Hmunphiah chungchang sawiin, “Kan lei ang” a ti dum dum a, a hnu lawkah a leina tur cheng Vbch. 110 nen lam kan dah fel vek tawh a ti bawk. RR Associates te hian fin kherek chhuahin lei lo mahse Hmunphiah chingtute Hmunphiah thar chhuah hi sorkar hian a ranglama leisak thuai turin kan phut a ni, a ti bawk.
MPYCC Senior Vice President Pu Ngurdingpuia pawhin, February 21 Assembly Session-a hmunphiah chingtute harsatna chungchang Chief Minister-in a sawinaah, hmunphiah hring lei tum Vai lokal turte lo danga, lo vau pawl an awm thu a sawi pawh a hmunah tlawhin RR Associates-te’n sorkarin Hmunphiah hralhna rate a siam avanga chhuanlam siamin kuthnathawktute’n hralh lo thei lo dinhmunah an din huna an mangan lai chuha lei tumin an inthiarfihlim zawk a ni, a ti.
Ram hruaitute berin Hmunphiah chingtute chu hmunphiah hralh dawna Hmunphiah tihhuh ching anga an sawi ta mai chu inhmuhsitna leh indiriamna zahthlak tak a ni, a ti.
Pu Ngurdingpuia chuan, he thil hi Congress thalaite chuan kan en liam mai mai dawn lo. Sorkar hian hmunphiah chingtute an Compensate ngei tur a ni. Intiamna neia inzuar an ni a, felfai takin an intiamna chu an kalpui tur a ni. Kuthnathawktute tana an intiam avânga mipuiin theihtawpa hnathawk leh anmahni Vote tam tak an awm. Contract/Agreement terms and condition bawhchhiatna avânga kuthnathawktute pawisa chân zozai hi sorkar hian Compensate ngei ngei tur leh zangnadawmna pe thuai turin kan phut a. Sorkarin an ‘Agent’ te an intiam anga an lei theihloh vanga, kan tuar tlang a ni ber mai, ti ringawt lova, sorkarin kuthnathawktute zangnadawmna pe tur leh Agent te pawh an intiamna an hlen loh avangin an lakah Mizoram sorkar hian Claim sak ngei turin kan phut a ni, a ti.
Kolasib District hi Mizorama hmunphiah thar nasa leh a huan siam nasa ber an ni a. A bikin Vairengte ah an tam zual hle a, Hmunphiah chingtu Association member chhungkaw 40 chuang an awm mek a ni. Tunah hian sorkar inrawlh miah lo turin Hmunphiah leikhawmtute chuan an duh a, Silchar mihausa te pawhin RR Associates leh sorkar inrawlh lo turin an duh bawk. W
Vawiina Kolasib District-a Hmunphiah chingtute Hmunphiah chinna hmun an tlawhnaah hian Congress Thalai hruaitute hi Vairengte-a Congress Thalai hruaitute Pu H. Lalhmingsanga, President, MPYCC Serlui Block, Pu Lalbiaknia, Secretary, Serlui Block, Pu Darthanzauva, Adviser, Serlui Block leh Pu P.C Zothansanga, Joint Secretary, MPYCC, General Headquarters ten an tawiawm a ni.
