Lungsen, 8/4/2022: Vawiin hian Group YMA Lungsen hnenah Thorang bialtu MLA Pu Zodintluanga Ralte chuan Ambulance a hlan a, Ambulance hlanna programme ‘Presentation of Ambulance to Group YMA Lungsen’ chu YMA Hall, Lungsen North Branch-ah neih a ni.
Ambulance hlanna programme-ah hian a hlantu bialtu MLA hian thu sawiin, Thorang bial hmasawnna bialtu MLA Pu Zodintluanga chuan a sawi a, “Thorang biala kan han tlin a, kan sorkar ve khan High School 5 kan din thawt a. Lungsena High School kan neihte pawh Exam Centre-ah kan han din ve thei ta a ni. Lungsenah hian khawtlang mipuite thahnem ngaihna zarah, District khawpuiah pawh din harsa Higher Secondary kan han nei leh theite hi a lawmawm tak zet a ni,” a ti.
Thorang biala khaw hrang hrangte hi tun hma chuan inkalpawhna mumal a awm loh avangin mipuiin harsatna nasa tak an tawk tih bialtu MLA chuan a sawi a. Tun tuma a zinah erawh chuan Thorang bial chu kawngpuiin inkalpawh vek a lo ni ta chu malsawmna tam tak a nih thu a sawi bawk.
“Kum li dawn kan sorkar loh chhung hian bial chhung khua ka kal chhuaka mipui leh mimalah sorkar atanga tanpuina a awm lo a, a mangan thlak em em a ni. Health Care ang pawhin kan buai em em a, SEDP an sem thu ka lo hria a, ka lo lawm em em laiin an thlanate leh an pek danah a pawi ka ti em em a ni. Khaw khatah chuan Vaimim bag khat theuh chhungkaw thumah an pe a, kan va zawt chianga lo pawh an lo nei si lo. Vaimim bag khat chinna ram vat pawh an awm lo a, Vaimim chi an dawng dawn tih pawh an hre lo,” Zodintluanga chuan a ti.
Ngaihtuah chiang lo leh mipuite hmangaih lovin an sem tihna a ni a, a pawi ka ti hle a ni. Kan bial chhunga kan tawn a nih avangin a pawi ka ti ema vawiin programme-ah ka sawichhuak a ni, Pu Zodintluanga chuan a ti bawk.
“Lungsen atangin Lungleiah damloh tumin inphurh rawp rawp a ngai a, vanneihthlak takin inphurhna tur Ambulance air condition kan in pe thei a. Lungsen leh a chhehvel mipuiten an mamawhna hriaa Group YMA Lungsen ten vanneihthlak taka Ambulance min lo dawn sak thei hi ka lawm em em a ni,” bialtu MLA Pu Zodintluanga chuan a ti a ni.
Group YMA Lungsen hian khaw 11 a huama Lungsen khua bikah hian Primary Health Centre a awm a, Group YMA kutah awm mahse Group chhung khaw hrang hrangte he Ambulance hian a huam vek dawn niin Group YMA lam atang chuan thu dawn a ni bawk.
